न्यूजमधेश डेस्क
राजविराज ,२२ जेष्ठ । सप्तरीको कञ्चनरुप नगरपालिका–१ ले विश्व वातावरण दिवसका अवसरमा आज कब्रिस्तान र वडा कार्यालयको प्राङ्गणमा वृक्षरोपण गरेको छ ।
सो क्रममा नगरप्रमुख वसन्तकुमार मिश्रले बढ्दो वायु प्रदुषण घटाउन र जलवायु परिवर्तन अनुकूलन गर्न वृक्षोपण महत्वपूर्ण रहेको बताउनुभयो ।
उहाँले वातावरणीय असर परिरहेकोले रुखबिरुवाको संरक्षणमा जोड दिनुभयो ।
कब्रिस्तान र वडा कर्यालयमा गरी जम्मा तीन सय वटा मलेसियन सखुवाको बिरुवा रोपेको वडा नम्बर १ का वडा अध्यक्ष करिम शेखले बताउनुभयो ।
यसैगरी तिलाठी कोइलाडी गाउँपालिका–३ सकरपुरास्थित १५ कठ्ठा जग्गामा निजी वन साझेदारी कार्यक्रमअन्तर्गत आज वृक्षरोपण भएको छ ।
सो अवसरमा महगनी जातको ३५ वटा विरुवा रोपिएको र घेरबार गरिएको १५ कठ्ठा जग्गामा वृक्षरोपण गरिने वृक्षरोपण कार्यक्रमका संयोजक देवनारायण झाले जानकारी दिनुभयो ।
गाउँपालिकाभरि वृक्षारोपण कार्यक्रमलाई अघि बढाउने प्रक्रिया सुरु भएको जानकारी दिनुहुँदै गाउँपालिका अध्यक्ष सतिशकुमार सिंहले वृक्षरोपण कार्यलाई सहजतासाथ अगाडि बढाउन गाउँपालिकाले आफ्नै नर्सरी समेत व्यवस्थापन गरेको बताउनुभयो ।
संयुक्त राष्ट्र संघको आह्वानमा प्रत्येक वर्ष जुन ५ लाई विश्व वातावरण दिवसका रूपमा सन् १९७४ देखि मनाउन थालिएको हो । कोरोना भाइरसको संक्रमण बढ्दो रहेको अवस्थामा सामाजिक दुरीलाई ध्यानमा राखी स्वास्थ्यको मापदण्ड अपनाई वृक्षरोपण कार्य गरिएको थियो ।
