न्यूजमधेश डेस्क
जनकपुरधाम,५ असोज।सञ्चार उद्यमी अरुण सिँहानिया हत्या प्रकरणमा उच्च अदालत जनकपुरले जिल्ला अदालत धनुषाकै फैसला सदर गरेको छ ।
जिल्ला अदालतको फैसलाप्रति असन्तुष्टि जनाउँदै पूर्वराज्यमन्त्री सञ्जयकुमार साहलगायतका अभियुक्त उच्च अदालतमा पुनरावेदन गरेका थिए ।
उच्च अदालतले बुधबार घटनाका मुख्य योजनाकार दाबी गरिएका पूर्वराज्यमन्त्री साहलाई जन्मकैद र अन्य अभियुक्तहरुका हकमा भएका जिल्ला अदालतको फैसला सदर हुनेगरी फैसला सुनाएको हो ।
घटनामा अभियुक्त बनाइएका र तीन वर्षको कैद जिल्ला अदालतले तोकेको रामविनोद यादवको हकमा पनि फैसला सदर भएको छ ।
यादव तीन वर्ष कैद सजाय भुक्तान गरी जेलमुक्त भइसकेका छन् ।
उच्च अदालतमा गत भदौ २९ गतेबाट सुनुवाइ भएको मुद्दामा यादवका तर्फबाट वरिष्ठ अभिवक्ता दिनेश त्रिपाठी, वरिष्ठ अधिवक्ता सुनिल पोखरेल, अधिवक्ताहरु अजयकुमार पटेल, चन्द्र मैनाली, दीपक केसी र मुकेश कार्कीले बहस गरेको थिए,भने वादी नेपाल सरकार र जाहेरवालाका तर्फबाट उच्च सरकारी वकिल कार्यालयका सह न्यायधिवक्ता यदुनाथ शर्मा, शाखा अधिकृत राजलाल यादव, अधिवक्ता विपिनकुमार झा र हेमबहादुर कार्कीले बहस गरेका थिए ।
जनकपुरका सिँघानियाको २०६६ साल फागुन १७ गते होलीका दिन स्थानीय शिवचोकमा गोली हानी हत्या गरिएको थियो ।
