कमलेश ठाकुर
जनकपुरधाम ,१४ चैत्र । महोत्तरीको पिपरा गाउँपालिका–५ का ६५ वर्षीय मुसाफिर झा र उनकी ६० वर्षीया श्रीमती गीतादेवीको अपहरण गरी हत्या गरेको आशंकामा थप तीनजनालाई प्रहरीले पक्राउ गरेको छ ।
प्रदेश नम्बर(२ प्रहरी प्रमुख डीआईजी धीरजप्रताप सिंहका अनुसार पक्राउ पर्नेहरूमा स्थानीय विकास झा, कैलाश झा र शम्भु झा रहेका छन् । कैलास र विकास दाजुभाइ हुन् । उनी तीनैजना झा दम्पतीको नातेदार रहेको बुझिएको छ ।
अनुसन्धनका क्रममा संलग्नता देखिएकाले उनीहरू तीनैजनालाई शुक्रबार नियन्त्रणमा लिएको र उनीहरुको घरबाट झा दम्पतीको जलेको कपडा बरामद भएको डीआईजी सिंहले जानकारी दिए ।
गएको फागुन १० गते राति अपहरणमा परेका झा दम्पतीको दुई दिनअघि मात्र कंकाल फेला परेको थियो । कंकालको शुक्रबार पोस्टमार्टमपश्चात् दाहसंस्कार गरिएको छ ।
घटनामा संलग्न रहेको भन्दै प्रहरीले यसअघि छिमेकी रामबाबु यादव, उनका छोराद्वय सुरेन्द्र यादव, राजेन्द्र यादव र भारत, बिहारको मधुबनी घर भई बनौलीमा बस्दै आाएका हरेन्द्र ठाकुरलाई पक्राउ गरी सार्वजनिक गरिसकेको छ । घटनाको नेपाल प्रहरी र सीआईबी टोलीले अनुसन्धान गरिरहेको छ ।
