आशिष विश्वकर्मा
सिरहा,३१ चैत्र ।सिरहा कल्याणपुर नगरपालिकाका कार्यवाहाक मेयर र प्रशासकीय अधिकृतको मिलेमत्तोमा व्यापक अनियमिता भएको भन्दै वडाअध्यक्ष र कार्यपालिका सदस्यहरुले नै सोमबार तालावन्दि गरेका छन् ।
नगरसभाले पास गरेको योजनासमेत कार्यपालिका बैठक बिना नै आफ्नै ढङ्गले परिवर्तन गरी कार्यवाहक मेयर रोहिणी कुमारी यादव र प्रमुख प्रशासकीय अधिकृत जय प्रशाद दासको मिलेमत्तोमा व्यापक अनियमितता गरेको भन्दै तालाबन्दि गरेको हो ।
कल्याणपुर नगरपालिकाका बहुमत कार्यपालिका सदस्यसहित ९ जना वडाअधयक्षहरूले १५ वटा माग सहित नगर नगरपालिकामा तालाबन्दि गर्दै प्रेस विज्ञप्ती समेत जारी गरेका छन् । तालाबन्दी गर्ने क्रममा कल्याणपुर नगरपालिका ३ नम्वर वडा अध्यक्ष अशोक मण्डलले मेयर र प्रमुख प्रशासकीय अधिकृतको मिलोमतोमा कार्यपालिकालाई जानकारी नदिई विभिन्न योजनाहरू कमिसनको खेलमा नजीकका मानिसहरुलाई जिम्मा दिई आफूखुसि संचालन गरेको बताए ।
उनले मेयर र अधिकृतले कमिसन लिई योजना बितरण गरीरहेको बताए । उनले भने, ‘उपप्रमुख र अधिकृतले कमिसनको खेलमा नजिकका मानिसलाई कादिने गरेको छ, यो रोक्न हामीले पटक–पटक माग ग¥यौं, तर रोकिएन त्यसैले तालाबन्दी गर्न भयौं ।’ वडा नम्बर ८ का वडाअध्यक्ष राजेन्द्र साहले ९ महिनादेखि सामाजिक सुरक्षा भत्ता वितरण नहुनु, वडाका योजनाहरु पनि वडाअध्यक्षलाई जानकारी समेत नदिई आफूखुसि सञ्चालन गर्नु, उनीहरुभन्दा बाहिरका उपभोक्ता समितिहरुले गरेको कामको भुक्तानीमा आनाकानी गर्नुले आफूहरु आजीत भएको बताए ।
जारी विज्ञप्तीमा कार्यपालिका बैठक नबसि अपारदर्शी तरिकाले कर्मचारी भर्ना खारेज, पोखरी ठेक्कामा गरिएको अनियमितता पारदर्शी गर्नुपर्ने, अधिकृतले आफुखसी बाडेको योजनाहरू बदर गरि कार्यपालिकाको निर्णय अनुसार गर्नुपर्ने, वडाअध्यक्षहरूको जानकारी बिना नगरस्तरीय योजनाको उपभोक्ता समिति गठन प्रक्रिया रोक्नु पर्ने लगायतका माग उल्लेख गरेका छन् ।
प्रेस विज्ञप्ति मा ८ जना वडा अध्यक्ष र ७ जना कार्य पालिका सदस्य सहित १५ जनाको हस्ताक्षर रहेको छ । कल्याणपुर नगरपालिकामा १२ वडाहरू रहेका छन् ।
