कमलेश ठाकुर
जनकपुरधाम ,४ जेष्ठ ।प्रदेश सभा सचिवालयले पाँच महिनापछि गत चैत ३० गते प्रदेश सभा बैठक डाके । प्रतिपक्षिसंगै सत्तारुढ दलहरुले प्रदेश सरकारको आलोचना गर्न थालेपछि बाध्यतात्म बैठक बोलाइएको थियो ।
पाँचौ अधिवेशनको पहिलो बैठक पश्चात बैशाख ९ गते दोस्रो बैठक आह्वान भयो । दास्रो बैठकमा नाम र राजधानीको लागि दर्ता भएको प्रस्तावमाथि छलफल भएर अर्को बैठक बैशाख १४ गतेको लागि डाके । तर, बैठकको एक दिन पुर्व प्रदेशसभा सचिवालयमा कार्यरत तीनजना कर्मचारीमा कोरोना संक्रमण देखिएको भन्दै अर्को सुचना नआए सम्मको लागि बैठक स्थगित गरे । बैठक स्थगित भएको सोमबार २२ दिन पुगेको छ । सचिवालयको संक्रमित कर्मचारीहरु निको भएर घर फर्किसकेका छन् । तर, बैठक अन्यौलमै छन् ।
नेकपा एमाले संसदीय दलका नेता शत्रुधन महतोले महामारीमा बैठक नबोलाएको भन्दै आपत्ति जनाए । ‘ज्यानको डर सबैलाई छ भनेर आफ्नो जिम्मेवारीबाट पञ्छिनु गलत हो,’ उनले भने, ‘वैकल्पिकमाध्यमबाट भएपनि बैठक बोलाउनु पर्छ ।’ महामारीको बेला सदनमा जनताको विषयवस्तु उठेन भने सरकारको लचारीपन झल्किने उनले टिप्पणी गरे ।
सदन चल्न नसक्दा जनताको समस्या सरकारमाझ राख्न नसकेको भन्दै अगामी बजेटबारे समेत सरकारले कुनै तयारी गर्न नसकेको उनले जानकारी दिए । ‘अहिले प्रमुख दुई वटा विषयमा बैठक बस्नु आवश्यक छ । एक जनताको जनधनको रक्षा अर्को अगामी बजेटको तयारी,’ उनले भने, ‘तर, सरकार वेवास्ता गरे झै गरेका छन् । सरकारले छिटो विकलप दिएन भने जनता निरास हुन्छ । र, बिना तयारी हत्तारमा ल्याउने बजेटले पनि ठोस योजना समावेश गर्न सक्दैन् ।’ बैठक बोलाउन प्रयास भइरहेको भन्दै जेठ १० गते भित्र बैठक बस्ने उनले अशा गरे ।
नेपाली काँग्रेस संसदीय दलका नेता राम सरोज यादवले महामारीमा सरकार निक्कमा साबित भएको तर्क गरे । सरकारले गत वर्ष पनि कोरोना महामारी नियन्त्रणमा चुकेको भन्दै अहिलेको भयावह स्थित सरकारकै कारण सिर्जना भएको उनले आरोप लगाए । प्रदेश सरकारले महामारीमा जनताको जनधनको रक्षा गर्न नसकेको भन्दै ‘भोजको बेला तरकारी रोपेको’ भन्दै कटाक्छ गरे । ‘सरकार बेकामे छ । सदन चल्दा उसको आलोचना हुन्छ,’उनले भने, ‘सरकारले नाकामी लुकाउन बैठक नै बस्न दिएको छैन् ।’
प्रदेश २ मा कोरोना महामारीको अवस्था भयावाह छ । सरकारको तयारी प्रभावकारी भएको छैन् । संक्रमितले भेन्टिलेटर र अक्सिजन अभावमा ज्यान गुमाइरहेका छन् । कोभिड अस्पताल सञ्चालमासमेत ढिलाई भइरहेको छ भने भएको अस्पतालमा जनशक्ति र स्रोतसाधन अभावमा बिरामी छट्पटाइरहेका छन् ।
गरिबले राहत नपाउँदा भोकै बस्ने गरेको अवस्थासमेत आएको छ । तर, सरकार निष्फिक्री छन् । सरकारले जनताको समस्यालाई वेवास्ता गरेको देखिएको छ ।
