न्यूजमधेश डेस्क
काठमाडौं,१९जेष्ठ । नेपाली नक्कली नोट र लागुऔषध ब्राउनसुगरसहित झापाबाट एक जना पक्राउ परेका छन्।
मंगलरबा राति ११ बजे झापाको दमक नगरपालिका वडा नम्बर १ स्थित राधे होटल एण्ड लजको कोठाभित्र लागुऔषध ब्राउन सुगर खरीद विक्री भइरहेको सूचनाको आधारमा दमकबाट खटिएको प्रहरी टोलीले दमक नगरपालिका वडा नम्बर ३ बेलडाँगी बस्ने वर्ष ३२ का पूर्ण बहादुर बानियाँलाई खानतलासी गर्दा नेपाली नक्कली नोट र ब्राउन सुगर फेला परेको जिल्ला प्रहरी कार्यालय झापाका प्रवक्ता नायव उपरीक्षक राकेश थापाले जानकारी दिए।
बानियाँले लगाएको बक्स हाफपेन्टको पछाडिको गोजीभित्र हेर्दा नक्कली जस्तो देखिने एउटै नोट नम्वरहरु भएको एक हजार दरको नेपाली रुपैयाँको नोट ८ थान र ठूलो, सानो प्लाष्टिकको २ वटा प्याकेटमा रहेको ४७ ग्राम ५३० मिलिग्राम प्रतिबन्धित लागुऔषध ब्राउन सुगर जस्तो देखिने लिसाईलो पदार्थ फेला परेको प्रहरीले जनाएको छ।
बानियाँलाई नियन्त्रणमा लिई आवश्यक अनुसन्धान तथा कानुनी कारबाहीको लागि इलाका प्रहरी कार्यालय दमकमा राखिएको र झापा जिल्ला अदालतबाट म्याद थप गरी थप कानुनी प्रकृया अगाडि बढाइने प्रहरीले जनाएको छ।
