न्यूजमधेश डेस्क
काठमाडौं ,२१ असार । कुनै सरकारी कार्यालयका हाकिम तथा अन्य कर्मचारीले केही काम गरिदिएबापत वा काम गर्न तपाईसँग घुस मागेर हैरान पारेका छन् ?
यदि कसैले त्यसरी घुस मागेर हैरान पारेका छन् भने तुरुन्त अख्तियारमा खबर गरेमा अख्तियारले पक्राउ गरी कारबाही चलाउने अख्तियारका प्रवक्ता नारायणप्रसाद रिसालले जानकारी दिए ।
अख्यिारले त्यस्तै सूचनाका अधारमा पछिल्लोपटक राष्ट्रिय पुननिमार्ण प्राधिकरण जिल्ला आयोजनामा कार्यान्वयन इकाइ ओखलढुंगाका सबइन्जिनियर राजन पासवानलाई ३० हजार रुपैयाँ घुससहित पक्राउ गरी कारबाही अघि बढाएको छ ।
पासवानले भूकम्पबाट क्षतिग्रस्त घर पुनर्निमार्णको तेस्रो किस्ता भुक्तानी गरिदिएबाफत सेवाग्राहीसँग ३० हजार मागेर हैरान पारेको थिए । सेवाग्राहीले त्यसको जानकारी अख्तियारलाई दिएर उनी आफैले ३० हजार दिएपछि अख्तियारको टोलीले पासवानलाई सेवाग्राहीको रकमसहित पक्राउ गरेको हो ।
अख्तियारका प्रवक्ता रिसालले अख्तियारले १४ वैशाखयता सेवाग्राहीको सूचनाका आधारमा सेवाग्राहीले रकम दिएपछिको अवस्थामा तीन जनालाई पक्राउ गरी कारबाही अघि बढाएको जानकारी दिए ।
