न्यूजमधेश डेस्क
जनकपुरधाम ,२५ श्रावण। आरती साहलाई एसिड प्रहार गरेको आरोपमा धनुषा जिल्ला अदालतले उनका श्रीमान् सञ्जीव साहलाई कसुर गरेको ठहर गर्दै सजाय निर्धारणका लागि पेस गर्ने आदेश गरेको छ । एसिड विक्रेता नागेन्द्र साहको हकमा भने अदालतले सफाइ दिएको हो ।
जिल्ला अदालतका न्यायधिश कृष्णमुरारी सिवाकोटीको एकल इजलासले एसिड प्रहार गरेको आरतीका श्रीमान् सञ्जीवलाई कसुर ठहर गरेको हो । जिल्ला अदालत धनुषाका सूचना अधिकारी गंगाकुमार मिश्रका अनुसार कसुर ठहर गरिएका सञ्जीवलाई तोकिने कैद सजाय र क्षतिपूर्तिका लागि एक महिनाभित्रमै अर्को फैसला हुनेछ ।
गतवर्ष मात्र ल्याइएको तेजाव तथा अन्य घातक रासायनिक पदार्थ नियमन अध्यादेशअनुसार एसिड प्रहारमा यतिविध्न कठोर सजाय तोकिएको यो नै पहिलो घटना हो । सरकारले यो अध्यादेश जारी गरेलगत्तै आरतीमाथि एसिड प्रहार गरिएको थियो । यो मुद्दामा ७ चोटी पेसी चढेको थियो ।
आरतीको तर्फबाट सरकारी वकिल कार्यालय जनकपुरका प्रमुख सिताराम अर्याल, रिंकुकुमारी यादव र अच्यूतम आचार्यले बहस गरे भने प्रतिवादीका तर्फबाट सुदीप कोइराला, दीपक केसी र अरुणकुमार झाले बहस गरेका हुन् । एसिड आक्रमणले दाहिने आँखा नै गुमाएकी आरती भने काठमाडौंमा उपचाररत्त छिन् । उनको कृत्रिम आँखा लगाउने उपचार भइरहेको छ ।
छुट्टिएर बसिरहेकी श्रीमती र छोरीलाई डेरामै पुगेर गत वर्ष कात्तिक २९ गतेको बिहान सञ्जीवले एसिड प्रहार गरेका थिए । जनकपुरधाम–७ पेठिया इलाकामा बस्ने २२ वर्षीया आरती र ४ वर्षीया छोरी रिया एसिड प्रहारबाट घाइते भएकी थिइन् ।
आरतीलाई लक्षित गरेर प्रहार गरिएको एसिड उछिट्टिएर छोरी रियाको बायाँ हात पनि जलेको थियो । आरतीलाई जनकपुरको जानकी हेल्थ केयरको आकस्मिक कक्षमा प्रारम्भिक उपचारपछि थप उपचारका लागि काठमाडौं लगिएको थियो ।
एसिड प्रहारले आरतीको अनुहारको दायाँ भाग, आँखा, छाती र हात जलेको छ । सञ्जीव र आरतीको ५ वर्षअघि विवाह भएको थियो । बिहेको दुई वर्षपछि उनीहरू छुट्टाछुट्टै डेरा लिएर बस्न थाले । छोरीसँगै राखेकी आरती तरकारी बेचेर गुजारा चलाउथिइन् । सञ्जीव विभिन्न पसलमा काम गर्दै छाड्दै हिंड्ने गरेका थिए । दुवैबीच सम्पत्ति लेनदेनमा झगडा थियो ।
घटनापछि फरार रहेका श्रीमान् सञ्जीव साहलाई साँझ धनुषा प्रहरीले पक्राउ गर्यो । अनुसन्धानमा साहले निखिल स्टोरबाट एसिड खरिद गरेको वयान दिएपछि प्रहरीले एसिड बिक्रेता नागेन्द्र साहलाई अर्कोदिन ५८ बोतल एसिडसहित नियन्त्रणमा लियो । यी दुवैविरुद्ध सरकारी वकिलको कार्यालयले २४ मंसिर २०७७ मा तेजाव तथा अन्य घातक रासायनिक पदार्थ नियमन अध्यादेशअनुसार धनुषा जिल्ला अदालतमा मुद्दा दर्ता गर्यो । यो अध्यादेश बमोजिम दर्ता भएको यो नै पहिलो मुद्दा हो ।
सञ्जीव र नागेन्द्रको विरुद्धमा अंगभंग, कुरुप र एकीकृत कसुरसहित ३ वटा मुद्दा दर्ता गरियो । मुलुकी ऐन कानुन अनुसार र तेजाव तथा अन्य घातक रासायनिक पदार्थ नियमन अध्यादेशअनुसार दुवैविरुद्ध तीनवटै मुद्दामा १५ वर्ष ६ महिना कैद सजाय र क्षतिपूर्ति माग गरिएको थियो । कान्तिपुरमा अजित तिवारीले लेखेको छ ।
