न्यूजमधेश डेस्क
जनकपुरधाम ,२२ असोज। विगत डेढ वर्षदेखि बन्द रहेको सीमा नाका नेपाल सरकारले गत साता खोल्ने निर्णय गर्यो ।
तर प्रदेश २ का जिल्लाहरुको मुख्य नाकाहरु समेत अहिलेसम्म पूर्ण रुपमा सञ्चालनमा आउन सकेको छैन । पर्सा र रौतहटमा केहि नाकाबाट भारतीय गाडीहरु आउने गरेको सम्बन्धित जिल्लाका प्रमुख जिल्ला अधिकारी बताउँछन् ।
तर सिरहा, सप्तरी, महोत्तरी, धनुषा लगायतका जिल्लाको नाकाबाट भारतीय गाडी समेत आवत–जावत गरेको देखिदैन । महोत्तरीको भिट्ठामोडमा त भारतीय एसएसबीले नेपालीलाई साइकल चढेर पनि भारतीय बजार जान दिएको छैन । माथिबाटै सवारी साधन आवत–जावत गर्न नदिने निर्देशन आएको भिट्ठामोड नाकामा खटेका एक एसएसबीले बताए ।
उनले भने, ‘नेपाल सरकारले बोर्डर खोलेको कुरा थाहा छैन । हामीलाई निर्देशन आएपछि नेपाली सवारीलाई प्रवेश गर्न दिन्छौं ।’ धनुषा प्रशासनले भारतीय नागरिकले स्वास्थ्य मापदण्ड अपनाएर आउन सक्ने बताएको छ ।
तर मापदण्ड पालना गरेर आउनेको संख्या न्यून छ । धनुषाको मुख्य नाका हो जटही । तर अहिले सुनसान छ । न नेपाली सवारीहरु भारत जाने गरेको देखिन्छ, न भारतीय सवारीहरु नेपाल आउँदै गरेको । सिमाको अवस्था हेर्दा नेपाल र भारतबीच समन्वयको अभाव देखिन्छ । सिरहाको नाकाहरु पनि पूर्णरुपमा सञ्चालनमा आएको छैन ।
त्यहाँका प्रमुख जिल्ला अधिकारी प्रदिपराज कणेल भन्छन्, ‘भारतीय एसएसबीलाई मन लागेको बेला सवारी आवत–जावत गर्न दिन्छ । मन नभएको बेला रोक्छन् । यस विषयमा समन्वय गरिरहेको छु ।’ नाकाबाट यात्रुबाहक सवारीहरु आवत–जावत नहुँदा सर्वसधारण समस्यामा परेका छन् ।जनकपुर टुडेबाट लिएको हो ।
दशैंका बेला एउटा नाकाबाट मात्रै दैनिक हजारौं नेपाली मजदुर फर्किन्छन् । तर गाडी नचल्दा पैदल यात्रा गर्न बाध्य छन् उनीहरु । सवारी नचल्दा व्यवसायी समेत मर्कामा परेका छन् ।
