न्यूजामधेश डेस्क
रुपन्देही ,१५ कार्तिक । दक्षिण एशियाली क्षेत्रीय सहयोग सङ्गठन (सार्क) का महासचिव इसाला रुवाल विराकुनले आज लुम्बिनीमा कठिन चिवर दान गर्नुभएको छ ।
बौद्ध परम्पराअनुसार भिक्षुहरु तीन महिना वर्षवासमा बसेर निस्किएपछि गरिने पवित्र ‘कठिन’ उत्सवअन्तर्गत आज लुम्बिनीमा आयोजना गरिएको विशेष धार्मिक समारोहका बीच उहाँले भिक्षु सङ्घलाई कठिन चिवर दान गर्नुभएको हो । सार्कका महासचिव विराकुनको सहयोगमा लुम्बिनीस्थित राजकीय बुद्ध बिहारले संयोजन गरेको कठिन उत्सवमा नेपालका विभिन्न जिल्लासहित विदेशी मुलुकका बौद्ध उपासक उपासिकाको सहभागिता रहेको थियो ।
तीन महिना वर्षावासमा बसेका भिक्षुका लागि गरिने कठिन दानका लागि लुम्बिनीमा दुईदिने कठिन उत्सवको आयोजना गरिएको हो । लुम्बिनीको राजकीय बुद्ध विहारमा तीन महिना वर्षावासमा बस्नुभएका भिक्षु सागर धम्मलगायत विभिन्न क्षेत्रका २४ जना भिक्षु, गुरुआमालाई बौद्ध परम्पराअनुसार कठिन चिवर दान र अष्टपरिष्कार दान गरिएको थियो ।
कठिन उत्सव समारोहमा बोल्दै सार्कका महासचिव विराकुनले बुद्ध भूमिमा आएर कठिन चिवर दान गर्न पाउँदा खुसी लागेको बताउनुभयो । उहाँले लुम्बिनीको विकास र बुद्ध दर्शनको प्रचारप्रसारका लागि आफ्नो सदैव सहयोग रहने प्रतिबद्धता जनाउनुभयो ।
लुम्बिनी विकास कोषका उपाध्यक्ष भिक्षु मेत्तेयले नेपालमा बुद्ध धर्मको विकासमा श्रीलङ्का र म्यान्माको ठूलो योगदान रहेको बताउँदै यसलाई अझै प्रचारप्रसार गर्न आवश्यक रहेकोमा जोड दिनुभयो ।
राजकीय बुद्ध विहारका प्रमुख भिक्षु सागर धम्मले कठिन चिवर दानको महत्वबारे जानकारी गराउँदै दाताको सहयोगबाटै भिक्षुको जीवन चल्ने बताउनुभयो । उत्सवमा सार्कका महासचिव विराकुनलाई सम्मान गरिएको थियो ।
यस्तै बुद्ध धर्म र दर्शनको प्रचारमा योगदान पु¥याएको भन्दै लुम्बिनीको धर्मस्वामी महाराज बुद्ध बिहार, विभिन्न क्षेत्रमा योगदान पु¥याउने सशस्त्र प्रहरी बेस क्याम्प लुम्बिनी, सशस्त्र प्रहरी नायब उपरिक्षक दर्शन गिरी, राधिका न्यौपाने, राधेश्याम गुप्तालाई सम्मान गरिएको थियो ।
कार्यक्रमअघि लुम्बिनीको थाई मन्दिरबाट बृहत् झाँकीसहितको शोभा यात्रा निकालिएको थियो । कठिन उत्सवअन्तर्गत बुधबार राजकीय बुद्ध विहारमा भिक्षु सङ्घबाट परीत्राण पाठ तथा बुद्ध पूजा सम्पन्न गरिएको बौद्ध महिला समितिका सचिव कल्पना हरिजनले जानकारी दिनुभयो ।
