न्यूजमधेश डेस्क
जनकपुरधाम, ५ बैशाख । आसन्न स्थानीय तहको निर्वाचनलाई मध्यनजर गर्दै डा.सीके राउत नेतृत्वको जनमत पार्टीले उम्मेद्वारहरुको टुंगो लगाउँदैछ । कुनै दलसँग चुनावी तालमेल नगर्ने निर्णयमा पुगेको जनमतले आफ्नो उम्मेद्वारहरुलाई टिकट वितरण गर्न लागेको हो ।
भ्रष्टाचार विरोधी आन्दोलन चलाएको जनमत पार्टीले उम्मेद्वारको मापदण्ड समेत तय गरेको छ । जसमा भ्रष्टाचारविरुद्ध शून्यसहनशीलता रहेको जनमतका नेता बीपी साहले बताएका छन् ।
पालिका तथा वार्डहरुका लागि टिकट पाउन जनमत पार्टीले भ्रष्टाचार नगनेृ प्रतिबद्धतापत्रमा हस्ताक्षर गर्नेलाई टिकट दिइने नेता साहले जानकारी दिएका हुन् ।
जनमत पार्टी मुख्यतः प्रदेश नं. १, मधेश प्रदेश, लुम्बिनी प्रदेशमा आफ्नो उम्मेद्वारी दिन लागेको हो । यस्तै अन्य प्रदेशहरुमा पनि जनमतका उम्मेद्वारहरु रहने साहले बताए ।
मुख्यतः जनमतको आधार क्षेत्र मधेश प्रदेश, प्रदेश नं. १ र लुम्बिनी प्रदेश रहेको बताउँदै नेता साहले यी तीनवटै प्रदेशमा बलियो उपस्थिति हुने दाबी गरेका छन् ।
