न्यूजमधेश डेस्क
विराटनगर ,२३ बैशाख। सत्तारुढ गठबन्धनले तय गरेका उम्मेदबारहरु संकटको अवस्थामा पुगेका छन् । नेताहरुले आफ्नै रगतका साइनोलाई उम्मेदबार बनाएपछि मतदाताले उनीहरुलाई मत नदिने मनसायमा पुगेका छन् ।
पछिल्लो पटक गठबन्धनले बनाएका उम्मेदबारहरु नेताकै रगतको साइनोका छन् । चितवनको भरतपुर महानगरपालिकामा नेकपा माओवादीका अध्यक्ष पुष्पकमल दाहाल ‘प्रचण्ड’ ले आफ्नै छोरीलाई मेयरको र जनता समाजवादी पार्टीका अध्यक्ष उपेन्द्र यादवले विराटनगर महानगरपालिकामा आफ्नै छोरालाई उप मेयरको उम्मेदबार बनाएका छन् ।
भरतपुरमा दाहालले आफ्नै छोरी रेणुलाई उम्मेदबारबनाएपछि गठबन्धन अन्तर्गतका कांग्रेसका नेताहरु असन्तुष्ट भई आफ्नै उम्मेदबार बनाएका छन् ।
विराटनगरमा पनि यस्तै अवस्था छ । यहाँ जसपाका सकृय नेता उमश यादवलाई टिकट नदिइएपछि उनी स्वतन्त्र उम्मेदबार बनेका छन् । र, उनले लालटिन चुनाव चिन्ह पाएका छन् । नेकपा माओवादी केन्द्रले टिकट नदिएपछि उपमेयरमा स्वतन्त्र उम्मेदबार बनेकी नमिता न्यौपानेले पनि सोही चुनाव चिन्ह पाएकी छन् ।
उमेर र नमिताले एकै चुनावचिन्ह पाएपछि निर्वाचन एकैसाथ लड्न दुबै जना तयार भएका छन् । उमेशले जसपाको र नमिताले माओवादीको भोट तान्नेछन् । यस्तो अवस्थामा गठबन्धनका उम्मेदबार कमजोर बन्ने आँकलन गर्न सकिन्छ ।
यसका साथै आम मतदाता पनि अध्यक्ष उपेन्द्रका छोरा अमरेन्द्रलाई भोट दिन इच्छुक देखिएका छैनन् । त्यसैले अहिले आफ्नो छोरालाई जिताउनैपर्नेमा बल लगाइरहेका उपेन्द्र यादवलाई चिन्ताको भारी बोक्नुपरेको छ ।
