न्यूजमधेश डेस्क
जनकपुरधाम,३ जेष्ठ ।तरार्ईमधेसको चुनावी प्रतिस्पर्धा मित्रवत् हुँदैन । प्रतिस्पर्धीहरूका बीच एकअर्कालाई सत्तोसराप गर्ने, इज्जतप्रतिष्ठा खुइल्याउने र जिउज्यानलाई घात पुर्याउनेसम्मका काम सामान्य कुरा हो । तर, मंगलबार धनुषाको विदेह नगरपालिकामा अचम्मपर्ने खालको अनाठो दृश्य देखियो ।
मेयर पदमा दोहोरिएका ५० वर्षीय बेचनदास तत्माले ३७ वर्षका प्रतिद्वन्द्वी नेकपा (एकीकृत समाजवादी) का राजकिशोर रोहिता यादवलाई सम्मान गरे । अंगालो हाले । विजयोत्सव मनाउन तत्मालाई पर्खिरहेका हजारौंको भिडमा पुग्नुअघि उनले यादवका कानमा सानो स्वरमा भने, ‘चुनाव न हो । कोही जित्छन् र केही हार्छन् । तर, यो जित तपाईंकै हो । हामी दुवैका उद्देश्य समान छन् । जनताका हितमा हातेमालो गरौंला ।’
तत्माका कुरा सुनेर पराजयपछि निराश र चिन्तित बनेका यादवको मुहारमा अलिकबेर मुस्कान आयो । र, उनले पनि विदेहवासीका पक्षमा जुटेरै काम गर्ने प्रतिबद्धता जनाए ।
यादव तत्माका निकटतम प्रतिद्वन्द्वीमात्र होइनन् । कुनैबेला सँगै काम गरेका सहयात्री पनि हुन् । नगरपालिका नेतृत्वमा फेरबदल भएको भए आशलाग्दा मेयर पदका उम्मेदवार पनि । चुनावी पण्डितहरूले अन्तिम समयसम्म यादवले जित्ने अनुमान गरेका थिए । तर, जनादेश भने अघिल्लो कार्यकालका मेयर तत्माकै पक्षमा गयो ।
दलित समुदायका तत्मा पनि एमालेको किल्ला भत्कन दिएनन् । विदेह नगरपालिकामा यसपालि उम्मेदवार परिवर्तन गर्ने एमालेका केही नेताका दबाबलाई अस्वीकार गर्दै तत्मालाई नै उम्मेदवार बनाउने वातावरण बनाएका एमाले केन्द्रीय सदस्य सञ्जीवकुमार झा सुरजको विश्वास र भरोसालाई उनले कायम राखे ।
अघिल्लो कार्यकालमा दलित सामन्तीका रूपमा दोखबात लागेका तत्माले प्रतिस्पर्धीलाई अंगालो हालेर सबैलाई विश्वासमा लिएर अघि बढ्ने सुरुवात गरेको टिप्पणी स्थानीयले गरेका छन् । तत्माले प्रशोधक डटकमसँग भने, ‘म नगरवासीका हितमा सबै राजनीतिक शक्तिलाई समेटेर जान चाहन्छु ।’
मेयरमा निर्वाचित तत्माले मात्र होइन, उपमेयरमा जितेकी ५१ वर्षीया आशादेवी झाले पनि असल संस्कार र व्यवहार प्रदर्शन गरिन् । उनले पनि आफ्ना निकटतम प्रतिद्वन्द्वी २५ वर्षीया संजना अधिकारीसँग घाँटी जोडिन् ।
स्थानीय पत्रकार विपिन यादवले भने, ‘उमेरले जेठा विजितहरूले कान्छा प्रतिद्वन्द्वीहरूलाई गरेको यो व्यवहार अनुकरणीय छ । यसले विदेहको भविष्य एक्यबद्ध भएर कोर्ने बाटो खुलेको छ ।’
