न्यूजमधेश डेस्क
कपिलवस्तु,९ जेष्ठ। कृष्णनगर नगरपालिका- ११ सौनहवामा हिजो बेलुका दुई वटा मोटरसाइकल एकापसमा ठोकिँदा एक जनाको मृत्यु भएको छ। सोही दुर्घटनामा चार जना घाइते भएका छन्।
कृष्णनगरबाट चन्द्रौटातर्फ जाँदै गरेको लु७५प ४१३ नम्बरको मोटरसाइकल र विपरीत दिशाबाट आउँदै गरेको तीन जना सवार लु८प १५०२ नम्बरको मोटरसाइकल हिजो बेलुकी सवा ८ बजे आपसमा ठोकिएका हुन्।
गम्भीर घाइते भएका १५०२ नम्बरको मोटरसाइकल चालक कृष्णनगर नगरपालिका- १० बकौलीका २२ वर्षीय राजेशलाल चौरसियाको उपचारका क्रममा शिवराज अस्पतालमा मृत्यु भएको हो।
घाइते भएका अर्को मोटरसाइकल चालकसहित चार जनाको सोही अस्पतालमा उपचार भइरहेको ईलाका प्रहरी कार्यालय गणेशपुरले जनाएको छ।
