राजविराज, २० जेष्ठ ।सप्तरीको हनुमाननगर कंकालिनी नगरपालिकाको नगरकार्यपालिका सदस्य पदको निर्वाचनमा जसपा र जनमत पार्टीका उम्मेदवार निर्वाचित भएका छन् ।
नगरकार्यपालिकाको सम्पन्न मतपरिणाम अनुसार जसपाबाट ६ र जनमतबाट २ जना निर्वाचित भएका हुन् ।
दलित वा अल्पसंख्यक खुल्लातर्फ ३ पदका लागि भएको निर्वाचनमा जनमत पार्टीले २ र जसपाले १ सिट जितेको छ । जनमतबाट विरेन्द्र कुमार राम, लोकेन्द्र ठाकुर विजयी भएका छन् भने जसपाबाट राजनारायण साह निर्वाचित भए । यसैगरी महिलातर्फ जसपाबाट ५ वटै पदमा जसपाका उम्मेदवार निर्वाचित भएका छन् । निर्वाचित हुनेहरुमा राज कुमारी सदा, कौशल्यादेवी मण्डल, मंजुली देवी पासवान, रविना खातुन र चन्द्र कुमारी विजयी भएको निर्वाचन अधिकृतको कार्यालय हनुमाननगर कंकालिनी नगरपालिकाले जनाएको छ ।
कार्यपालिका सदस्य पदमा ६ जना निर्वाचित भएसँगै जसपाको बहुमत भएको छ । जसपामा उपप्रमुख १ वडा अध्यक्ष ७ र ६ जना नवनिर्वाचित सदस्य गरी कार्यपालिकामा जसपा एक्लैको १४ जना सदस्य पुगेको छ । कूल २४ कार्यपालिकामा जनमतबाट १ नगरप्रमुख २ वडा अध्यक्ष र २ निर्वाचित गरी ५ जना, माओवादी केन्द्रको ४ जना र नेपाली काँग्रेसको १ जना कार्यपालिका प्रतिनिधित्व गरेका छन् ।
यसैगरी बलान विहुल गाउँपालिकाको गाउँ कार्यपालिका सदस्यमा जनमत र काँग्रेसका उम्मेदवार निर्वाचित भएका छन् । जनमत पार्टीबाट दलित अल्पसंख्यक तर्फ २ महिलातर्फ २ गरी ४ जना र काँग्रेसबाट महिलातर्फ २ जना उम्मेदवार कार्यपालिका सदस्यमा निर्वाचित भएको निर्वाचन अधिकृतको कार्यालय बलानविहुल गाउँपालिकाले जनाएको छ ।
जनमत पार्टीबाट खुल्लातर्फ संजिव कुमार शर्मा र संतोष कुमार साह विजयी भएका छन् । महिलातर्फ जनमतबाट अमला देवी यादव र सरस्वती कुमारी यादव विजयी भईन् भने नेपाली कांग्रेसबाट सुलेखा देवी यादव र ललिता देवी मण्डल विजयी भएको निर्वाचन अधिकृतको कार्यालयले जनाएको छ ।
