न्यूजमधेश डेस्क
काठमाडौं,२ असार । प्रतिनिधि सभाको राज्य व्यवस्था तथा सुशासन समितिकाे बैठक ८ महिनादेखि बस्न सकेकाे छैन। पछिल्लाेपटक समितिकाे बैठक २०७८ असोज २० गते बसेको थियाे ।
बैठकमा अख्तियार दुरुपयोग अनुसन्धान आयोग र निर्वाचन आयोगको वार्षिक प्रतिवेदनबारे तयार उपसमितिको प्रतिवेदनमाथि छलफल गरिएको थियो । त्यसयता समितिको बैठक बस्न सकेको छैन । अब कहिले बस्छ भन्ने निश्चित पनि छैन ।
प्रतिनिधि सभाको जेठ २५ गतेको बैठकमा कांग्रेस सांसद् अमरेशकुमार सिंहले याे विषया उठान गरेका थिए । उनले भनेका थिए, ‘यो समिति एक सालदेखि निष्क्रिय छ । संसद् विघटनको बेला मात्रै होइन, सरकार बनेपछि पनि निष्क्रिय छ । त्यो चाहिँदैन भने खारेज गरौँ । त्यो समितिका सदस्यहरुलाई अर्को समितिमा पठाउन म सभामुखलाई आग्रह गर्छु ।’
सिंह सोही समितिका सदस्य हुन् । समितिका तत्कालीन सभापति शशी श्रेष्ठ मन्त्री बनेपछि बैठक रोकिएकाे हाे । अन्तिम बैठक बसेको पर्सिपल्ट अर्थात्, असोज २२ गते नै श्रेष्ठ भूमि व्यवस्था, सहकारी तथा गरिबी निवारण मन्त्री बनिन् । समितिको कार्यविधिमै सभापतिले बैठक बोलाउने व्यवस्था छ ।
तर, सभापति नै मन्त्री भएपछि समितिको बैठक बोलाउने व्यक्ति भएन । त्यसपछि आफूहरुको समिति निष्क्रिय भएको समितिका सदस्यहरुको भनाइ छ । तत्कालीन सभापति श्रेष्ठका अतिरिक्त सोही समितिबाट अन्य पाँच जना सदस्यहरु पनि मन्त्री बनेका थिए ।
समितिमा तत्कालीन समयमा रहेका २७ सदस्यमध्ये ६ जना मन्त्री भएपछि समितिमा सदस्य संख्या मात्रै घटेन, त्यहाँभित्रको शक्ति संरचनामा पनि परिवर्तन आएको छ । आगामी बैठकलाई प्रभाव पार्ने अर्को विषय यो पनि हो ।
अहिले २४ जना मात्रै सदस्य छन् । ३ जनाको पूर्ति हुन बाँकी छ ।
