न्यूजमधेश डेस्क
सबैला,२५ असार। जिल्लाको सबैला नगरपालिकामा बालविवाहमा कमी आएको छ । बालविवाह रोक्न किशोरी र आमाहरु नै सक्रिय भएर लागेपछि यहाँ अहिले बालविवाहमा कमी आएको हो ।
सबैला नगरपालिकामा बालविवाह न्यूनिकरण गर्न यहाँका सबैजसो वडामा छात्रा सञ्जाल र आमा समूह गठन गरिएको छ । उहाँहरु बालविवाह हुन लागेको जानकारी पाएपछि अभिभावक र किशोरीलाई सम्झाउने बुझाउने गर्नुहुन्छ । यसलगायत सानै उमेरमा विवाह गर्दा स्वास्थ्य तथा कानूनी समस्याका बारेमा विद्यालय र टोल–टोलमा किशोरी भेला गरेर जानकारी दिने गर्नुहुन्छ ।
आसमान नेपालले बालविवाह न्यूनिकरण परियोजना अन्तर्गत सबैला नगरपालिकाको १३ वटै वडामा छात्रा सञ्जाल तथा आमा समूह गठन गरेको छ । सो समूहले बालविवाह न्यूनिकरणका क्षेत्रमा कार्य गर्नुका साथै विद्यालय बाहिर रहेका विद्यार्थी उमेर समूहका बालबालिकालाई विद्यालयसम्म पठाउन सहजीकरणको भूमिका समेत निर्वाह गर्दै आउनु भएको छ ।
उहाँहरुसँग कतिको सङ्ख्यामा बालविवाह रोकेको भनेर आधाकारिक तथ्याङ्क नभएपनि थुप्रै बालविवाह रोकेको बताउनुहुन्छ ।
सबैला नगरपालिका–११ इनर्वाकी रविताकुमारी यादवले यस नगरपालिकामा ८० प्रतिशत बालविवाहको घटनामा कमी आएको बताउनुभयो । उहाँले विपन्न, दलित र मुस्लिम समुदायमा अझै कुरिति विधमान रहेको बालविवाह मुक्त हुन नसकेको जानकारी दिनुभयो ।
चेतना अभाव र धार्मिक अन्धविश्वासले यहाँ बालविवाह गर्ने क्रम रोकिएको छैन । अभिभावकको जिम्मेवारीबाट छिट्टै मुक्त खोज्नु, पछि गएर छोरी विवाह गर्न समस्या हुने र छोरीलाई कम उमेरमै कन्यादान गर्दा पुण्य पाइन्छ भन्ने मान्यताले बालविवाह जटिल समस्याको रुपमा रहेको छ ।
‘निक शिक्षा दिअ’ परियोजनकी कर्मचारीसमेत रहनुभएकी रविताले विस्तारै सुधार हुँदै जाने बताउँदै बालविवाह रोकथाम सम्बन्धी कार्यक्रम सञ्चालन पश्चात किशोरीहरु स्वयम् जागरुक बन्न थालेको भन्नुभयो ।
बालविवाह रोकथाम गर्न सक्रिय छात्रा सञ्जाल तथा आमा समूहले उमेर नपुगी विवाह गर्दा विवाह दर्ता, बच्चा भइहाले बच्चाको जन्मदर्ता र किशोरीको स्वास्थ्य समस्या आउने जस्ता कुरा किशोरी र तिनका अभिभावकलाई सम्झाउने गरिएककाले बालविवाहको दर निकै कम भएको बालविवाह न्यूनिकरण परियोजनाकी संयोजक दुर्गा अधिकारीले बताउनुभयो ।
उहाँले बालविवाह गर्दा शिक्षाबाट वञ्चित हुने, किशोरी आमाहरूको स्वास्थ्यमा असर पुग्ने र सम्बन्ध पनि दिगो नहुने भन्दै किशोरीहरूले गाउँमा सचेतना अभियान थालेका जानकारी दिनुभयो ।
सबैला नगरपालिकाकी नगर उपप्रमुख रहिमा खातुनले बालविवाह न्यूनिकरण चुनौतीका रुपमा रहेको भन्दै छात्रा सञ्जाल र आमा समूहको प्रयासले सफलता प्राप्त गरिरहेको बताउनुभयो । उहाँहरुले विद्यालय र गाउँमा घरदैलो अभियानमार्फत बालविवाहविरुद्ध सचेतना जगाउने काम गर्नुभएको उहाँले भन्नुभयो ।(गतिलो खबर)
