न्युजमधेस डेस्क
जनकपुरधाम,६ साउन। मधेस प्रदेशको राजधानी जनकपुरधाम क्षेत्रमा एक वडा-अध्यक्षले बदमासी गरेका छन्। शहिदनगर नगरपालिकाको एक वडाध्यक्षले चोरेर सरकारी सम्पति बेच्न लागेको खुलेको छ ।
धनुषाको शहिदनगर नगरपालिका वडा नम्बर ३ यदुकूहास्थित रहेको प्राथमिक स्वास्थ्य केन्द्रको सम्पतिहरु वडा नम्बर ३ का वडाध्यक्ष मनोज दासले बेच्न लागेको खुलासा भएको छ ।
वडाध्यक्ष दासले प्राथमिक स्वास्थ्य केन्द्र यदुकुहामा रहेको वृक्ष, टेलब, कुर्शी, दराज लगायतका अन्य समानहरु कसैलाई जानकारी नै नदिई बेच्न लागेको खुलेको हो ।
अस्पताल व्यवस्थापन समितिका अध्यक्ष समेत रहेका वडाध्यक्ष दासले अस्पतालमा लगाईएको वृक्षहरु कटान गरी बेच्नको लागि गोप्य निर्णय गरेको खुलेको छ ।
शहिदनगर नगरपालिका अन्तर्गत पर्ने सो प्राथमिक स्वास्थ्य केन्द्रको सो निर्णय बारे स्थानीय सरकारलाई नै अधिकारिक जानकारी नरहेको खुलेको छ । सम्पतिहरु बेच्न थालेको सन्दर्भमा नगरपालिकालाई कुनै जानकारी नै नरहेको बताइएको छ ।
नगरपालिका अन्तर्गत रहेको स्वास्थ्य समितिको सँयोजक एवम् वडा नं. ८ का वडाध्यक्ष तनुकलाल कुसियैत यादवले अस्पतालको सरकारी सम्पति बेचबिखन गर्ने सम्बन्धी आफूलाई कुनै जानकारी नरहेको बताएका छन् ।
पत्रकार संगको कुराकानीमा सँयोजक यादवले कुनै सम्पति बेचबिखन गर्नुपर्दा नगरपालिकालाई जानकारी गराउनुपर्नेमा कुनै जानकारी नदिनु भनेको चोरेर सम्पति बेच्ने दाउमा रहेको बताए ।
अस्पतालका निमित्त प्रमुख सुमन कुमार मण्डलले एक गोप्य टेन्डरको गैर–कानुनी सूचना छापेर अस्पतालको सम्पति बेच्न लागेको खुलेको छ । उनले एक कागजमा आफैँले प्रिन्ट गरेको सूचनामा सम्पतिहरु खरिद बिक्रीको लागि उल्लेख गरेको छ ।
टेन्डर प्रक्रिया गर्दा कुनै राष्ट्रिय पत्रिकामा वा ई–बीडमा प्रकाशन गर्नुपर्ने प्रावधान रहेपनि वडाध्यक्ष दासले नगरपालिकालाई समेत कुनै जानकारी नै नदिई अस्पतालको सम्पतिहरु बेच्न लागेको खुलेको छ ।
स्थानीय सरकार अन्तर्गत चल्ने प्राथमिक स्वास्थ्य केन्द्र यदुकूहाले शहिदनगर नगरपालिकालाई समानहरु बिक्रीको बारेमा कुनै जानकारी नदिएको बुझिएको छ । वडाध्यक्ष दासले आफूखुसी चोरीलुकी समितिको निर्णय पास गरी समानहरु बेच्न लागेको बुझिएको छ ।
सूचनामा उनले अस्पताल हाताभित्र रहेको सपेताको वृक्ष, कुर्शी, टेबल, दराजसहित अन्य उपकरणहरु समेत बेच्न लागेको खुलाएको छ । ३ लाख रुपैयाँमा सपेताको वृक्ष बेच्न लागेको उल्लेख छ ।
अस्पताल जस्तो क्षेत्रलाई हराभरा बनाएको सपेताको वृक्षलाई कटान गरी उनी बेच्न लागेको हो । वडाध्यक्ष दासले कसैलाई जानकारी नदिई आफ्नो गोजीमा रकम झ्वाम्म पार्ने गरी समानहरु बेच्न थालिएको टिकाटिप्पणी गरिएको छ ।
साउन १० गते अस्पतालमा उपस्थिति भएर समान खरिद गर्न चाहनेलाई बोलाएको छ । यद्यपी, यसको बारेमा शहिदनगर नगरपालिकालाई नै कुनै जानकारी भने छैनन् ।
यस सन्दर्भमा शहिदनगरको स्वास्थ्य शाखा, प्रशासनलाई कुनै जानकारी नरहेको बताइएको छ ।
प्रशासनीक हिसाबले स्थानीय सरकारलाई जानकारी नै नदिई चोरीलुकी सम्पतिहरु बेच्न थालेपछि नगरपालिकाले कारवाही प्रक्रिया अगाडी बढाउने भएको छ ।
यस सन्दर्भमा वडाध्यक्ष दासले समितिले सम्पतिहरु बेच्ने निर्णय गरेको स्वीकार गरे । उनले नगरपालिकालाई चिठ्ठी काटने भनिएको बताउँदै यसबारे आफू बुझ्ने बताए ।
