न्युजमधेस डेस्क
महोत्तरी,११ श्रावण।
महोत्तरीमा विद्युत् चुहावटको गम्भीर समस्या देखिएको छ । पछिल्लो समय खडेरीका कारण सिँचाइको लागी अत्यधिक उपकरण प्रयोग हुनुले पनि चुहावटका घटनामा वृद्धि भइरहेको विद्युत् प्राधिकरण गौशाला वितरण केन्द्रले जनाएको छ ।
गौशाला वितरण केन्द्रले जिल्लाको गौशाला नगरपालिका, भंगाहा नगरपालिका, औरही नगरपालिका, बर्दिबास नगरपालिका र सोनामा गाउँपालिका हेर्दै आएको छ ।
गौशाला वितरण केन्द्रका प्रमुख प्रविन कुमार मिश्रका अनुसार सबैभन्दा बढी चुहावट यही क्षेत्रमा भइरहेको छ । विशेषगरी गौशालाको पर्सा, मगरथाना, खेस्राहा, बिजलपुरा, हात्तिलेट जस्ता ठाउँमा ठूलो मात्रामा चोरी हुने गरेको पाइएको छ ।
प्राधिकरणमा चुहावटका अत्यधिक सूचना आउन थालेपछि नेपाल प्रहरीको सहयोगमा अहिले रात्रिकालीन अप्रेसनसमेत सुरुवात गरिएको प्राधिकरणले जानकारी दियो ।
गौशाला वितरण केन्द्रका अनुसार पछिल्लो १ हप्तामा १५ भन्दा बढी विद्युत् चोरी गरेर सञ्चालन गरिरहेको मेसिन नियन्त्रणमा लिइएको छ ।
आर्थिक वर्ष २०७७/७८ मा विद्युत् चुहावटको दर निक्कै उच्च थियो । वितरण केन्द्रका प्रमुख प्रविन कुमार मिश्रका अनुसार अघिल्लो वर्ष ३२ प्रतिशत चुहावट भएको थियो भने यो वर्ष यसलाई घटाएर २८.८५ प्रतिशतमा झारिएको छ ।
विद्युत् आउने,जाने समस्या खेपिरहेका सेवाग्राहीहरू यसबाट छिट्टै मुक्त हुने प्रमुख मिश्रको दाबी छ । एक वर्षदेखि चुहावटका समस्यालाई पहिचान गरी गहिराइमा पुग्ने प्रयास गरिरहेको उनले जानकारी दिए । यो वर्षमात्र विद्युत् चोरी गर्नेलाई लिएको जरिवानास्वरुप २५ लाख राजस्व उठेको छ ।
प्राधिकरणले चोरी गर्नेलाई निगरानी बढाएपछि सो कार्यमा संलग्न १२६ जनालाई पक्राउ गरेको छ भने २ सय भन्दा बढी उपकरण र मेसिन जफत गरिएको छ ।
कम भोल्टेज आउने, लाइनमा उतारचढाव आइराख्ने जस्ता समस्याले जिल्लाका व्यापारिक सहरमा व्यापारी प्रताडित बन्दै आएका छन् ।
कतिपयले प्राधिकरण र ब्याट्री, युपिएस, जेनेरेटर व्यापार गर्ने व्यापारीहरूको मिलेमतोमा नै लाइन काटिरहने समस्या बनेको स्थानीयको आरोप छ ।
के भन्छन् स्थानीय ?
ब्यापारीमात्र हैन लाइनमा आइरहने अवरोधले स्थानीयसमेत आजित बनेका छन् । स्थानीयहरूले प्राधिकरणप्रति आक्रोश व्यक्त गर्दै अघोषित लोडसेडिङको जिम्मेवारी लिनुपर्ने बताए ।
‘लाइन काट्ने समस्या प्राविधिक समस्या हो कि योजनामुताबिक नै काटिएको त्यसको प्रस्टीकरण प्राधिकरणले सेवाग्राहीलाई दिनुपर्छ,’ स्थानीय रामनाथले भने ।
विशेषगरी युपिएस तथा ब्याकअप नराख्ने आइटी सम्बन्धित व्यापारीलाई लाइन आउने र जाने समस्याले निक्कै समस्या बन्दै आएको छ ।
‘लोडसेडिङ छैन र हुँदैन भनेर ब्याकअप राखिएन । झ्याप-झ्याप लाइन जाने समस्याले मेरो कम्प्युटर नै बिग्रिसक्यो, काम समयमा दिन सकिएको पनि छैन,’ बर्दिबास कि सविता भण्डारीले भनिन् ।
