न्यूजमधेश डेस्क
काठमाडौं,२ श्रावण । सत्ता गठबन्धनका शीर्ष नेताहरुको बैठक बोलाइएको छ। बैठक आज बिहान १० बजे प्रधानमन्त्रीनिवास बालुवाटारमा बस्नेगरि बोलाइएको छ।
बैठकमा आउँदो मंसिर ४ गतेलाई तय भएको प्रदेशसभा र प्रतिनिधि सभा निर्वाचनका लागि सिट बाँडफाँटका विषयमा छलफल हुने छ। यसअघि बुधबार दिउँसो सिट बाँडफाँट कार्यदलको बैठक बसेको थियो। कार्यदलका संयोजक एवम् कांग्रेस नेता कृष्णप्रसाद सिटौलाले बैठकका क्रममा नेताहरुसँग भेट्न बाँकी रहेको सुनाएका थिए।
सिट बाँडफाँटको प्रस्ताव ल्याउन शीर्ष नेताहरुले कार्यदल गठन गरेपनि कार्यदलले खाका तयार पार्न सकेको छैन। बुधबारको बैठकले सिट संख्याको मोडालिटी र दलहरुको जनमतबारे पाँचै दलका शीर्ष नेतासँग बस्नुपर्ने निष्कर्ष निकालेको थियो।
गत २० साउनमा बसेको पाँच दलीय गठबन्धनका शीर्ष नेताहरुको बैठकले प्रदेश सभा र प्रतिनिधि सभा चुनावमा तालमेल गर्ने निर्णय गर्दै ११ सदस्यीय कार्यदल गठन गरेको थियो।
कार्यदलमा नेपाली कांग्रेसका पूर्वमहामन्त्री कृष्ण प्रसाद सिटौला, महामन्त्री गगनकुमार थापा र ज्ञानेन्द्रबहादुर कार्की छन्।
माओवादी केन्द्रबाट वर्षमान पुन र देव गुरूङ, नेकपा एकीकृत समाजवादीबाट उपाध्यक्ष प्रमेश हमाल र महासचिव बेदुराम भुसाल, जनता समाजवादी पार्टीबाट रामसहाय यादव र रकम चेम्जोङ तथा राष्ट्रिय जनमोर्चाबाट हिमलाल पुरी र आनन्द शर्मा सदस्य छन्।
