न्यूजमधेश डेस्क
जनकपुरधाम,२३ भाद्र । धनुषाको लक्ष्मीनियाँ गाउँपालिका ४ सपहीबाट एक जनाको १ लाख ८० हजार रुपैयाँ लुटेर भागेका दुई युवकलाई धनुषा प्रहरीले पक्राउ गर्न सफल भएको छ ।
पक्राउ पर्नेमा लक्ष्मीनियाँ गाउँपालिका ६ निकालका २० वर्षीय भरोशी भन्ने नरेश यादव र वडा नम्वर ४ का २३ वर्षीय सरोज दास छन् ।
सपहीस्थित मेगा बैंकबाट रुपैयाँ निकालेर घर जाने क्रममा सोही ठाउँका ७५ वर्षीय राम दासको साथबाट बुधवार दिउँसो उनीहरु रुपैयाँ लुटेर भागेका थिए । पीडित दासले लगत्तै जिल्ला प्रहरी कार्यालयमा खबर गरेको थियो । त्यसपछि प्रहरीले खोजतलास गर्दै जाँदा लक्ष्मीनियाँ ४ बाटै उनी दुवै जनालाई पक्राउ गरेको बताइएको छ ।
धनुषाका प्रहरी प्रमुख एसपी बसन्त रजौरका अनुसार राम दास बैंकबाट रुपैयाँ निकाल्न गएदेखि नै उनीहरु पछ्याएका थिए । बैंकबाट रुपैया निकालेर घर पुग्ने क्रममा एकान्तमा गएलगत्तै उनीहरु रुपैयाँ लुटेर भागेको अनुसन्धानबाट खुलेको छ ।
लुटिएको रुपैयाँ र लुटपाट गर्न प्रयोग गरिएको ज. १२ प. ८५९३ नम्वरको पल्सर मोटरसाइकल समेत प्रहरीले बरामद गरेको छ । पक्राउ परेका यादवले आफ्नो घर अगाडी खाल्डो खनेर लुकाएको १ लाख ७५ हजार रुपैयाँ र दासको साथबाट १५ सय रुपैयाँ बरामद भएको एसपी रजौरले बताए ।
