न्यूजमधेश डेस्क
झापा ,९ असोज। नेकपा एमालेका अध्यक्ष केपी शर्मा ओलीले सत्ता गठबन्धन जनता प्रति अत्यन्त गैर जिम्मेवार भएको बताउनुभएको छ ।
नेकपा एमालेले झापाको दमकमा आइतबार आयोजना गरेको वृहत् पार्टी प्रवेश कार्यक्रमलाई सम्बोधन गर्दै अध्यक्ष ओलीले गठबन्धनले विकासका योजना काटेर देश विकासको कामलाई अवरुद्ध गरेको बताउनुभयो । स्वास्थ्य बिमा कार्यक्रम अघोषित रूपमा गठबन्धनले खारेज गरेको उहाँले प्रष्ट पार्नुभयो ।
गठबन्धन राष्ट्र र राष्ट्रियताको सवालमा समेत कुनै सल्लाह नगरी अघि बढेको उहाँले बताउनुभयो । नागरिकताको विषयमा गठबन्धनले नै व्यवधान खडा गरेको ओलीको भनाइ छ । ‘अहंकारी गठबन्धन, दम्भको गठबन्धन’, ओलीले भन्नुभयो ।
गठबन्धनले नागरिकताको समस्या समाधान गर्न नचाहेको कारण नागरिकता संशोधन विधेयक गोलमटोल पारेर ल्याएको ओलीले टिप्पणी गर्नुभयो । नेपालमा जन्मिएकालाई वंशजको आधारमा नागरिकता दिने कुरा दुई लाइन लखेर ल्याऊ एमालेले तुरुन्तै पास गरिदिन्छ भन्दा गठबन्धनले नटेरेको उहाँले बताउनुभयो ।
एमाले सरकारमा पुग्ने बित्तिकै नागरिकताको समस्या र सुकुम्वासी समस्या समाधान गर्ने ओलीले बताउनुभयो । चार वर्ष भित्र नागरिकता र सुकुम्वासीको समस्या स्थायी रूपमा ग्यारेन्टीका साथ समाधान गर्ने ओलीले प्रतिबद्धता व्यक्त गर्नुभयो ।
एमालेमा प्रवेशको लहर बढ्दै गएकोले गठबन्धनमा अँगालो मार्नेहरू झन् झन् अँगालो कस्दै गएका ओलीले बताउनुभयो । पाँच जना अँगालो कसेर बस्दै गर्दा तलबाट सबै खुस्कँदै गएको ओलीले टिप्पणी गर्नुभयो । ‘यो गठबन्धन डुब्न लागेकाहरूको त्यान्द्रो हो, कम से कम यो निर्वाचनमा केहीको राजनीति सिद्धिन्छ, कस कसको सिद्धिन्छ म अहिले भन्दिन, तिनीहरूले आफ्नो कर्मको फल यही जुनीमा भोग्दै छन्’, ओलीले भन्नुभयो ।
ओलीले मङ्सिर ४ मा हुने निर्वाचन पार्टीको पक्षमा पार्न केही बढी मेहनत गर्न नेता कार्यकर्तालाई आग्रह गर्नुभयो । तत्कालको लागि केही दुःखै गरेर भए पनि चुनावमा खट्न उहाँले निर्देशन दिनुभयो ।
