वीरगन्ज ,७ असार। जनमत पार्टीका नेता बीपी साहले अब मधेश प्रदेशमा एकल बहुमतको सरकार बन्ने दाबी गरेका छन् । पर्सा जिल्लामा आयोजित प्रशिक्षण कार्यक्रमलाई सम्बोधन गर्दै नेता साहले आगामी चुनावमा जनमत पार्टीलाई जनताले एकल बहुमत दिएर पठाउने वातावरण बनेको बताए ।
पर्सा जिल्लाका नेताहरुलाई प्रशिक्षण दिदै नेता साहले भने,‘आगामी चुनावबाट मधेश प्रदेशमा जनमत पार्टीको एकल बहुमतको सरकार हुनेछ । डा.सीके राउत प्रधानमन्त्रीको रुपमा आउनु हुनेछ। त्यही अनुसार हामीले काम गर्दै जानु पर्छ। जनताको विश्वासमा खडो उत्रिनु पर्छ र संगठनमा सबैलाई स्थान दिनु पर्छ।’
समाजवादी मोर्चा सत्ता टिकाउने झुण्ड मात्र भएको नेता साहले आरोप लगाए । जनमत पार्टीसँग डराएर उपेन्द्र यादवसहितको समाजवादी मोर्चा बनेको आरोप पनि उनले लगाए ।
जनमत पार्टीको पर्सा जिल्लाको विस्तारित बैठक एवं प्रशिक्षणमा बोल्दै नेता साहले भने,‘मधेश र देशमा अब एउटा मात्रै बैकल्पिक शक्ति छ त्यो हो जनमत पार्टी । मधेशीलाई ठग्दै आएको जसपा–लोसपाहरुको पतन भइसकेको छ । जनमत पार्टीसँग डराएर उनीहरुले समाजवादी मोर्चा खोलेका छन् । यो मोर्चा मन्त्री पद खान मात्र खोलिएको हो ।’
जनमत पार्टीले कुनै पनि दल वा मोर्चासँग गठबन्धन नगरी एक्लै अगाडि बढ्ने नेता साहले बताए । ‘यी डेट एक्सपायर दलहरुको समय समाप्त भयो। जनमत युगको सुरुवात भएको छ । जनताको आशा भरोसा अब डा.सीके राउतमाथि छ । त्यही भएर हामी एक्लै संगठन विस्तार र चुनावमा जित हाँसिल गर्नेछौं ।’
जनमत पार्टीमा अनुशासनको महत्व धेरै भएकोले अनुशासित भएर संगठन विस्तारमा लाग्न नेता साहले निर्देशन समेत दिए । जनमत पार्टीका पर्सा जिल्ला इन्चार्ज माधव सिंहको अध्यक्षतामा भएको कार्यक्रममा पूर्वमन्त्री करिमा बेगम, पूर्वसांसद प्रहलाद गिरी, सशी कपुर मिया, डा.अजय यादव, ओमप्रकाश सर्राफ, मुकेश द्वेदी, सिपु तिवारी, जय मिश्रा, दिपेन्द्र यादव, कन्हैयालाल झालगायतका नेता एवं कार्यकर्ताहरुको उपस्थिति रहेको थियो ।
