जनकपुरधाम।गत साउन २१ गते धनुषाको हँसपुर नगरपालिका प्रमुख र उपप्रमुख बीचको दुई पक्षिय झडपमा गम्भिर घाईते भएका स्थानीय ५७ वर्षीय तपेश्वर मण्डलको आज मृत्यु भएको छ।
धनुषाको हँसपुर नगरपालिकाका प्रमुख रामज्ञान मण्डल र उपप्रमुख रेणु झा पक्षधरबीच कार्यालय सार्ने क्रममा विवाद भएपछि झडप भएको थियो सो क्रममा हँसपुर नगरपालिकाकै स्थानीय अन्दाजी बर्ष ५७ का तपेश्वर मण्डल गम्भिर घाईते भएका थिए ।
प्रमुख र उपप्रमुखको विवादपछि ठुलो सँख्यामा प्रहरी परिचालन गरिएको थियो । प्रहरी र स्थानीयबीच समेत झडप भएको थियो ।
प्रमुख र उपप्रमुख पक्षधर र प्रहरीबीच भएको झडपको क्रममा मण्डल गम्भीर घाईते भएका थिए । घाईते पछि जनकपुर अञ्चल अस्पतालमा उपचाररत रहेका मण्डलको झण्डै एक महिनापछि उनको मृत्यू भएको जिल्ला प्रहरी कार्यालय धनुषाका प्रहरी उपरीक्षक शेखर खनालले जानकारी दिए ।
प्रहरीका अनुसार प्रमुख र उपप्रमुखको पक्षधरबीच भएको सो झडपमा उनी घाईते भएका थिए ।
मण्डलको मृत्यू भए लगत्तै उनका आफन्तहरुले जनकपुर अञ्चल अस्पतालमा केही बेर आन्दोलन गरेको थियो । घाईते मण्डलको मृत्यू प्रमुख मण्डलकै कारण र उनले नै कुटेको कारण भएको भन्दै कारवाहीको माग गर्दै नारावाजी गरेको थियो । उनीहरुले प्रमुख मण्डललाई कानुनी कारवाहीको माग गर्दै अञ्चल अस्पतालमै नारावाजी गरेपछि जिल्ला प्रहरी कार्यालय धनुषाबाट गएको टोलीले तत्कालै स्थिति नियन्त्रणमा लिएको जनाइएको छ ।
