चन्द्रनिगाहपुर । रौतहटमा डेंगुका बिरामी बढेका छन्। जिल्लाको चन्द्रपुर नगरक्षेत्रमा डेंगुका बिरामीको संख्या बढेको छ।
स्थानीयले चन्द्रपुर नगरपालिकाले लामखुट्टे विरुद्धको औषधि समयमा नछर्किएका कारण डेंगुका बिरामीको संख्या बढेको चिकित्सकहरू बताउँछन्।
चन्द्रनिगाहपुर सरकारी अस्पतालमा गत एक सातामा १२ जना डेंगुका बिरामी फेला परेको प्रमुख डाक्टर अभिनन्दन श्रीवास्तवले बताएका छन्। यो संख्या बढ्दै जान सक्ने उनले बताए।
यता चन्द्रनिगाहपुरमा रहेको सिम्स अस्पताल प्रालिमा पनि एक सातामा २० जनाभन्दा बढीमा डेंगु रोग देखा परेको छ। सिम्स अस्पतालका डाक्टर रामकिशोर साहका अनुसार एक सातामा सामान्य ज्वरो आएर चेक गराउन आउनेहरूको परीक्षणका क्रममा डेंगु रोग फेला परेको हो।
चन्द्रनिगाहपुरमा रहेका अन्य निजी अस्पतालमा समेत डेंगु रोगका बिरामी फेला परेका छन्। डाक्टरहरूका अनुसार लामखुट्टेको टोकाइबाट सर्ने यो रोग महामारीको रूपमा यस क्षेत्रमा देखा पर्ने अवस्था रहेको छ।
चन्द्रपुर नगरपालिकाले लामखुट्टे मार्ने औषधि समयमा नछरेका कारण डेंगु रोगका बिरामी बढ्दै जान थालेको स्थानीय बासिन्दा भरत आचार्यले बताए। एउटा मान्छेलाई टोकेको लामखुट्टेले अर्को मान्छेलाई टोकेमा डेंगु सर्ने स्वास्थ्यकर्मीको भनाइ रहेको छ।
