सिरहा । नेपाली कांग्रेसबाट बिद्रोह गर्दै मिर्चैयाका युवा नेता रामेश्वर यादव (मरर) जनमत पार्टीमा प्रवेश गरेका छन् । उनी बिहीबार औपचारिक रूपमा जनमतमा प्रवेश गरेका हुन् ।
नेता यादवलाई जनमत पार्टीका राष्ट्रिय अध्यक्ष एवं सांसद डा. सिके राउतले अबिर र खादा लगाई पार्टीमा स्वागत गरे । मधेश आन्दोलनपछि राजनीतिमा पूर्ण सक्रिय यादव मिर्चैया क्षेत्रमा स्थापित नेताका रूपमा चिनिन्छन् ।
उनी मधेशबादी दलमा आवद्ध रही लामो समय राजनीति गरे । तर, मधेशबादी दलमा आएको टुटफुटका कारण निरास भएका उनी केही समय निष्क्रिय बसे । त्यसको केही महिनापछि उनी नेपाली कांग्रेस प्रवेश गरे ।
जसपाको जिल्ला उपाध्यक्ष भइसकेका उनलाई कांग्रेस नेताहरूले पार्टीमा उचित व्यवस्थापन गर्ने र चुनावमा अवसर दिने आश्वासन दिएर पार्टी प्रवेश गराएका थिए । तर, न व्यवस्थापन गरियो, न चुनावमा अवसर ।
कांग्रेसमा झन् काम नलाग्ने पुराना नेता र उनीहरूको चाकडी गर्नेहरूको मात्र बर्चस्व रहेको भन्दै त्यहाँ राजनीति गर्न नसकिने निष्कर्षसहित पछिल्लो समय पनि उनी निष्क्रिय जस्तै थिए । सधैंभरि मधेशबादको वकालत गरेका उनी त्यहाँ ‘कम्फर्टेवल’ पनि महसुस गरिरहेका थिएनन् ।
जनमत पार्टी मधेशमा वैकल्पिक शक्तिको रूपमा उदाइरहेको र मधेशको कल्याण अब जनमत पार्टीबाटै सम्भव रहेको निष्कर्षमा पुगेर आफू जनमतमा आएको उनले बताए ।
