राजविराज । सप्तरी सदरमुकाम राजविराज नगरपालिकामा एक युवक मृत अवस्थामा भेटिएका छन् ।
नगरपालिकाको वडा नम्बर १३ स्थित पिप्राही र भेल्हीबीचको खाँडो खोलामा युवक मृत भेटिएको प्रहरीले जनाएको छ । मृतक युवक राजविराज नगरपालिका १२ बिषहरिया निवासी सुनिल कुमार यादव हुन् ।
१९ बर्षीय यादव साइकलसहित घोप्टो परेर मृत फेला परेको र नाकबाट रगत आएको देखिएको जिल्ला प्रहरी कार्यालयका प्रहरी निरीक्षक प्रमोद खड्काले जानकारी दिए ।
स्थानीयहरुले भने कसैले कुटपिट गर्दा उनको मृत्यु भएको बताएका छन् । प्रहरीले शवलाई पोष्टमार्टमका लागि गजेन्द्रनारायण सिंह अस्पताल ल्याएको र यो रिपोर्ट नआएसम्म केहि भन्न नसकिने जनाएका छन् ।
यसबारे अन्य अनुसन्धान भइरहेको जिल्ला प्रहरी कार्यालयले जनाएको छ ।
