जनकपुरधाम ,२९ साउन। मधेश प्रदेशका मुख्यमन्त्री सतिश कुमार सिंहले नेपाल दुरसंचार प्राधिकरणको सेवा प्रभावकारी बनाउन नेपाल दुरसंचार प्राधिकरणका प्रतिनिधिहरुसँग छलफल गरेको छ । उनले नेपाल दरसंचार प्राधिकरण, प्रादेशिक निर्देशनालय वीरगञ्जका निर्देशक नामाकर न्यौपानेसहितका प्रतिनिधिहरुसँग सो विषयमा मंगलबार छलफल गरेको हो ।
मुख्यमन्त्री सिंहले विशेष गरी वन क्षेत्रमा सर्वसाधारणले भोगिरहेको नेटवर्कको समस्यालाई निराकरण गर्न प्राधिकरणलाई आग्रह गरेको छ । उनले प्राधिकरणका प्रनितिधिहरुलाई छलफलको क्रममा नेपालको एकमात्र सरकारी दुरसंचार कम्पनी नेपाल दुरसंचार प्राधिकरणको सेवा राम्रो र स्तरीय बनाउन पनि सुझाव दिए ।
मुख्यमन्त्री सिंहले खासगरी मधेश प्रदेश महोत्तरी जिल्लादेखि पर्सासम्मको महेन्द्र राजमार्गमा पर्ने जंगल क्षेत्रमा नेटवर्कको निकै समस्या रहेको हुँदा सो समस्यालाई समाधान गर्न सुझाए । मुख्यमन्त्री सिंहले उनीहरुलाई भने, जंगलको सो क्षेत्रमा नेटवर्क नहुँदा दैनिक जसो सयौं आम सर्वसाधारणलाई समस्या हुने गरेको छ । त्यसैले सो समस्या सक्दो चाँडो अन्त्य गर्न उनले आग्रह गरे । त्यस क्षेत्रमा दुर्घटना हुँदा, गाडी बिग्रिदा वा यात्राको क्रममा कुनै आकस्मिक समस्या पर्दा सर्वसाधारणहरुलाई नेटवर्क नहुँदा ठुलो समस्या हुने गरेको छ ।
मुख्यमन्त्री सिंहले प्रदेशको सबै जिल्ला, नगरपालिका र गाउँपालिकाहरुमा ईन्टरनेटको सेवा सुविधाहरु तुस्तदुरुस्त बनाउन पनि प्राधिकरणका प्रतिनिधिहरुलाई आग्रह गरे । सूचना प्रविधिमै स्नाकोत्तर गरेका मुख्यमन्त्री सिंहले अहिले जनताको सेवा सुविधाहरुलाई प्रविधिमैत्री बनाउन सक्रिय भएका छन् ।
प्रविधिमैत्री सरकारको धारणा बनाएका उनले प्रदेशको सार्वजनिक सेवा प्रभावकारी, उत्तरदायी, पारदर्शी र तथ्यपरक बनाउन लागि परेका छन् । प्रदेशवासीको घर घरमा ईन्टरनेट र सहज नेटवर्कको सुविधा पुगे मात्रै सरकारको प्रविधिमैत्री योजनाहरु सफल हुने हुँदा उनी अहिले चौतर्फी रुपमा सम्बन्धित निकायहरुसँग सेवा विस्तारको लागि समन्वय गरिरहेका छन् ।
