जनकपुरधाम,३१ साउन।मधेश प्रदेश सरकारले प्रयोगविहीन सरकारी भवनहरूको स्थलगत अनुगमन तथा निरीक्षण गरेको छ।
बिहीबार मुख्यमन्त्री सतिश कुमार सिंहसहित मन्त्रीहरूले मिथिला नगरपालिकाको नकटाझिज रहेको कृषि निर्देशनालय र मुजेलियास्थित मणिपाल भवनको अनुगमन गरेको हो ।
संघीय सरकारको मातहतमा रहेका नकटाझिजस्थितका प्रयोगविहीन तथा जीर्ण भवनहरूको प्रदेश सरकारले वस्तुस्थिति बुझ्ने काम गरिएको मुख्यमन्त्री सिंहले बताए ।
उनका अनुसार प्रदेश सरकारमा चारवटा मन्त्रालयहरू ‘रेड जोन’ मा छन् । मधेस स्वास्थ्य विज्ञान प्रतिष्ठानमा सेवाग्राहीको चाँप अनुसार पर्याप्त ठाउँ नभएकोले यी दुई ठाउँको विकल्पका लागि प्रयोगविहीन सरकारी संरचनाको अवलोकन गरिएको उनले बताए ।
त्यसैगरी,जनकपुरधामको मुजेलियास्थित रहेको प्रदेश जनस्वास्थ्य कार्यलय,प्रदेश रक्त संचार सेवा र रामानन्द चौकस्थित बागवानीमा प्रदेश सरकारको लगानीमा निर्माणधिन अवस्थामा रहेका भवनको अनुगमन गरेका छ।
उनले भने, ‘आज सबै मन्त्रीज्यूहरू सल्लाह गरेर अनुगमनमा निस्केका हौँ,अनुगमन पनि गरियो । अब यी कार्यालयहरू संघीय सरकार मातहत छन् । समन्वय गरेर प्रदेश सरकारले विकल्पमा प्रयोग गर्ने योजना बनाउने छ । संघीय सरकारले सहमति दिएमा सबै जीर्ण भवनहरूलाई मर्मत तथा व्यवस्थित गरेर प्रयोगमा ल्याउँछौँ ।’
प्रदेश सरकारले अनुगमन गरेको नकटाझिज सरकारको स्वामित्वमा २८ बिघा जग्गा रहेको छ । त्यहाँ अहिले कृषि बिरुवा, धान, गहुँ उत्पादनको कार्य भइरहेको अनुगमनमा पाइएको प्रदेश सरकारको टोलीले जानकारी दिएको छ । प्रदेश सरकारबाट मुख्यमन्त्री सिंहसहित भौतिक मन्त्री सरोज कुमार यादव, अर्थ मन्त्री सुनिल कुमार यादव,कृषि मन्त्री जनार्दन सिंह क्षेत्री, शिक्षा मन्त्री रानी शर्मालगायतको सबै मन्त्रीहरुको उपस्थिति थियो ।
