न्यूजमधेश समाचारदाता
जनकपुरधाम, ५ मंसिर।जलाउँदै गरेको शव प्रहरीले नियन्त्रणमा लिएको छ । बाराको पचरौतामा शंकास्पद अवस्थामा जलाउन लागेको भन्दै शव प्रहरीले नियन्त्रणमा लिएको हो ।
प्रहरीले जल्दै गरेको शव फेला पार्दासम्म शरिरको अधिकांश भाग जलिसकेको जिल्ला प्रहरी कार्यालय बाराले जनाएको छ । जलिरहेको शव निभाएर मासु परीक्षणको लागि लगिएको प्रहरीले जनाएको छ ।
पचरौता नगरपालिका १ पिपरपातीकी ४० वर्षीया मालती देवी नुनियाको शव नेपाल भारत सिमा दशगजा नजिकै जमुनी खोलाको किनारमा जल्दै गरेको अवस्थाबाट प्रहरीले शव नियन्त्रणमा लिएको हो ।
मालतीलाई उनकै श्रीमान रामयाद महतो नुनियाले हत्या गरि जलाउन लगेको आशंका प्रहरीले गरेको छ ।
भारतको मोतिहारी माइती भएकी मालतीको शंकास्पद मृत्यु भएको खबर मालतीकै फुपाजुका छोरा राजकुमार महतोले प्रहरी चौकी पिपरपातीलाई खबर गरेका थिए ।
उनले दिएको सूचनाको आधारमा जिल्ला प्रहरी कार्यालय बाराका प्रमुख, एसपी बिकासराज खनालसहितको टोली बिहान ११ बजे मालतीको घर पुगेको थियो । तर उनीहरु घरमा नभएपछि प्रहरीले खोजी गरेको थियो ।
खोजतलासको क्रममा प्रहरीले बस्तीभन्दा करिब ४०० मिटर पर जल्दै गरेको अवस्थामा शव फेला परेको प्रहरी चौकी पिपरपातीका प्रहरी सहायक निरीक्षक शेष राहुल्लाहले जानकारी दिए ।
मृतक मालतीका दुई छोरा मध्ये सात वर्षीय एक छोरा फुपुको घरमा बस्दै आएका छन् भने अर्का छोरा श्रीमान् र सासुसँगै फरार रहेका छन् ।उनीहरुको खोजीकार्य भइरहेको प्रहरीले जनाएको छ ।
