न्यूजमधेश सम्बादाता
जनकपुरधाम, ५ माघ।मधेस आन्दोलनका प्रथम शहिद रमेश महतोको १३ औं बलिदानी दिवसको अवसरमा जनकपुरस्थित जानकी मन्दिरमा दिपप्रज्वलन गरिएको छ । समाजवादी विद्यार्थी यूनियन, धनुषाले शहिदहरुको सम्झनामा दिपप्रज्वलन गरेका हुन् ।
दिपप्रज्वलनमा समाजवादी पार्टीका प्रमुख सचेतक तथा प्रतिनिधिसभा सदस्य उमाशंकर अरगरियाले शहिदहरुको बलिदानी खेरजान नदिने प्रतिवद्धता जनाएका छन् । उनले संघीयता कार्यान्वयणमा जोड दिदै प्रदेशलाई अधिकार सम्पन्न र संविधान संशोधनका लागि संघर्ष जारी राखेका बताए ।
उनले वर्तमान कम्युनिष्ट सरकार संघियता विरोधी गतिविधिमा सक्रिय रहेको आरोप समेत लगाए । उनले संविधान संशोधन गर्ने लिखित सम्झौता गरी मधेससँग प्रधानमन्त्री ओली गद्दारी गरेको पनि बताए ।
दिपप्रज्वलन समारोहमा प्रदेश सांसद रामअशिष यादव, प्रदेश उपाध्यक्ष उर्मिला साह, प्रदेश सदस्य ममता मण्डल, जिल्ला अध्यक्ष पशुपति यादव, कमलेश यादव, सुनिल मण्डल, बलराम कापर, बिन्दी लाल महतो, प्रमोद कुमार अधिकारी, उमेश यादव, विकास यादव जितेन्द्र कापर लगायतका व्यक्तिहरुको सहभागिता रहेको थियो ।
