न्यूजमधेश सम्बादाता
जनकपुरधाम,१७ चैत्र । कोरोना संक्रमणबाट बच्न सरकारले लक डाउन लगाएपछि चैती छठ पर्व प्रभावित भएको छ । जनकपुरधामसहित प्रदेश २ का जिल्लामा भव्यताका साथ यो पर्व मनाउने गरिन्छ ।
लक डाउनका कारण सार्वजनिक पोखरी र जलासयमा जान नपाएपछि श्रद्वालुहरुले आफ्नो आँगनमै चैती छठ पर्व मनाएका छन् । सोमबार चैती छठ पर्व अन्तर्गत अस्ताउँदो सूर्यलाई अर्घ दिइएको छ । मुख्यतः छठ पर्व जलासय अगाडि मनाइने परम्परा रही आएको छ ।
लक डाउनका कारण बजार बन्द भएपनि जसोतसो सामग्रीको जोहो गरेर चैती छठ आफ्नो आँगनमै मनाइएको श्रद्वालुहरुले बताएका छन् ।
छठ पर्वको दिन भएपनि पोखरीहरुको शहर जनकपुरधामका पोखरीहरु सुनसान देखिएको छ ।
लक डाउनलाई प्रभावकारी बनाउन भन्दै धनुषा प्रहरीले कुनै पनि सार्वजनिक स्थान वा पोखरीहरुमा यो पर्व नमनाउन आग्रह गरेको थियो । यो आग्रहपछि यो पर्व मनाउनेहरुले आफ्नै आँगनमा सूर्यलाई अर्घ दिएर यो पर्व मनाउन बाध्य भएका छन् ।
राजविराजको कल्टु दास पोखरीमा छठ पर्व मनाउन श्रद्वालुले तयारी गरेपनि प्रहरीले मनाउन दिएनन् ।
कोरोना संक्रमण फैलिन नदिन सरकारले लक डाउन गरेपछि आस्थाका पर्व चैते छठ पनि नराम्ररी प्रभावित बनेको छ ।
