न्यूजमधेश सम्बादाता
जनकपुरधाम,१० बैशाख ।नेपाल पत्रकार महासंघ धनुषाका सभापति अनिल मिश्रले गुपचुप आफ्ना पकडका पत्रकारलाई राहत बाँडेपछि विवादमा तानिएका छन्।
महासंघका अन्य पदाधिकारीलाई जानकारी नै नगराई ६५ पत्रकारको सूची तयार पारेर सभापति मिश्रले राहत बाँडेका हुन्। लकडाउनका कारण छाकटार्न समस्या भएको भन्दै सभापतिले प्रतिपत्रकार १० किलो चामल, ४ किलो आलु, २ किलो प्याज, एक किलो दाल, एक लिटर खानेतेल सहितका सामान राहतस्वरुप वितरण गरेका छन्।
राहत पाएकामध्ये अधिकांश पत्रकार नामधारी मात्र छन्। उनीहरु पत्रकार महासंघको सदस्य रहे पनि मिडियामा काम गर्ने गरेका छैनन्। सूचीमा परेका केही पत्रकारले राहत स्वीकार गरेनन्। महासंघका अधिकांश पदाधिकारी राहत वितरण भएको विषयमा अनभिज्ञ छन्।
महासंघ धनुषाका सचिव पुरन गुप्ताले राहत वितरण गरेको विषयमा आफूलाई कसैले जानकारी नगराएको बताए। उनले भने, ‘राहत बाँडेको थाहा पाएपछि सभापतिलाई फोन गरेको थिए। तर कुन संस्था वा निकायले राहत उपलब्ध गराएको विषयमा उहाँले केही बताउनु भएन।’
यता, प्रेस युनियन धनुषाका सभापति राजन सिंहले आफूलाई फोन गरेर राहत लिन भनेपछि अस्वीकार गरेको सुनाए। अहिले कुनै पत्रकारलाई राहतको आवश्यकता थियो जस्तो मलाई लाग्दैन’, उनले प्रश्न गरे, ‘२–३ लाखको गाडी चढ्ने तर १० किलो चामल किन्न नसक्ने?’
उनले बाहिरबाट आएर डेरा लिएर बस्ने वा गरिब विपन्न पत्रकारलाई राहत दिँदा हुन्थ्यो, तर आफ्ना पकेटका नामधारी मात्रको पत्रकारलाई राहत बाँड्नु दुःखद भएको बताए।-नेपाल न्यूज
