न्यूजमधेश डेस्क
जनकपुरधाम ,२२ जेठ । तस्करसँग साँठगाँठ गर्ने प्रदेश २ का प्रहरीलाई कार्वाही गर्न शुरु गरिएको छ । प्रदेश प्रहरी कार्यालय जनकपुरधामले चार जना यस्ता प्रहरीलाई कार्वाही स्वरुप निलम्बन गरेको छ ।
लकडाउनको समयमा तस्करलाई सघाएको पाइएपछि उनीहरुलाई निलम्बन गरिएको छ ।
आर्थिक लाभ लिएर भारततर्फ सामान ओहोरदोहोरमा सहयोग पु¥याएको प्रमाण फेला परेपछि उनीहरुलाई निलम्बन गरिएको प्रदेश प्रहरी कार्यालयले जनाएको छ । निलम्बित हुनेमा एक जना प्रहरी सहायक निरीक्षक, दुई जना हबल्दार तथा एक जना जवान छन् ।
प्रहरी सहायक निरीक्षक राजाराम ठाकुर, प्रहरी हबल्दार विजय साह र चुनरमण चौरसिया र प्रहरी जवान अरुण तिबारीलाई निलम्बन गरिएको प्रदेश प्रहरी प्रमुख डिआइजी धीरजप्रताप सिंहले जानकारी दिए ।
यी चारै जना सर्लाहीको बिष्णु गाउँपालिकास्थित बबाल दोहन प्रहरी चौकीमा कार्यरत थिए । कार्यरत रहेको समयमा बिभिन्न तस्करसँग आर्थिक लाभ लिएर उनीहरुलाई तस्करी गर्न सघाइएको पाइएको डिआइजी सिंहले बताए ।
सिंहले प्रहरीभित्रको भ्रष्टाचार नियन्त्रण गर्न प्रहरीको शून्य सहनशिलता नीति अनुरुप उनीहरुलाई निलम्बन गर्दै थप अनुसन्धान शुरु गरिएको जानकारी दिए ।
