न्यूजमधेश डेस्क
जनकपुरधाम ,१५ असोज। प्रदेश नं. २ का भौतिक पूर्वाधार विकास मन्त्री जितेन्द्र सोनलले बाढीबाट वर्षेनी ठूलो धनजनको क्षति पु¥याउँदै आएको बलान नदी नियन्त्रणका लागि प्रदेश सरकार प्रतिबद्ध रहेको बताउनुभएको छ ।
सिरहा र सप्तरीको सिमानामा पर्ने बलान नदीले कटान गरेको स्थलहरुको आज स्थलगत अध्ययन तथा निरीक्षणपछि आयोजित समारोहमा उहाँले बलान नदीबाट हुने कटान र डुबानको समस्या समाधानका प्रदेश सरकार स्रोतसाधनले भ्याएसम्म प्रयासरत रहने प्रतिबद्धता व्यक्त गर्नुभएको हो ।
“प्रदेश सरकारले सक्ने जति तत्काल बजेट उपलब्ध गराएर नदी नियन्त्रण गर्छ” उहाँले भन्नुभयो, “प्रदेश सरकारले नसक्ने भए सङ्घीय सरकार र अन्य निकायलाई गुहारेर भएपनि नदी नियन्त्रण गरेरै छाड्छौं ।” बाढीबाट हुने कटान र डुवानबाट अब कुनै पनि बस्तीलाई जोखिममा पर्न नदिने उहाँको भनाइ छ ।
अध्ययन तथा निरीक्षण टोलीमा प्रतिनिधिसभा सदस्य रेणु यादव, राष्ट्रियसभा सदस्य मृगेन्द्रकुमार सिंह यादव र प्रदेशसभा सदस्य अभिषेक यादवलगायत हुनुहुन्थ्यो ।
