रामजानकी अस्पतालले ६ महिना २० दिनमै जन्मेको बच्चा बचाउन सफल

न्यूजमधेश डेस्क
जनकपुरधाम,२६ माघ। सामान्यतया महिला गर्भवति भएको ९ महिना पूरा भएपछि शिशुको जन्म हुन्छ। तर, कहिलेकाहिँ समय नपुग्दै शिशु जन्मन्छन्।

नेपालमा पनि आमरुपमा ७ महिनामा जन्मेको बच्चालाई भाग्यमानी ठानिन्छ। यद्यपि त्यसको कुनै वैज्ञानिक कारण प्रष्ट छैन। त्यसको मनोसामाजिक अर्थ समय अगावै जन्मिएर बाँच्न सफल भएकोले भाग्यमानी ठानिएको हुनसक्छ। समय नपुग्दै जन्मेका शिशुको शारीरिक र मानसिक विकास पूर्णरुपमा नहुने भएकाले जीवित रहने सम्भावना न्यून हुन्छ।

यता धनुषाको क्षिरेश्वरनाथ नगरपालिका वडा नम्बर १ की सीमा साहले गर्भ बसेको ६ महिना २० दिनमै बच्चा जन्माइन् । जन्मनेवित्तिकै बच्चाको स्वास्थ्यमा समस्या देखिएपछि उपचारका लागि जनकपुरस्थित रामजानकी अस्पताल लगियो । उपचारपछि सोमबार सीमालाई अस्पतालले डिस्चार्ज गरिदिएको छ । अहिले आमा र बच्चा स्वास्थ्यस्थित ठीक भएको चिकित्सकले जनाएका छन् ।

बच्चा ठीक भएपछि सीमा खुसी छिन् । भन्छिन्– बाँच्ने आश नै मरिसकेको थियो । अहिले धेरै खुसी लागेको छ । डाक्टरहरुलाई धन्यावाद दिन चाहन्छु ।

आमा र बच्चाको उपचारको संलग्न थिए, चिकित्सकत्रय डा। हेमन्त शर्मा, डा। इसाराजुम साह र डा। अनिल कुमार साह । डा। इसाराजुम भन्छन्, ‘बच्चाको स्थिति एकदम नाजुक थियो । साढे ५ महिनामा जन्मेको बच्चा बचाउनु हाम्रो लागि ठूलै चुनौती थियो । हामी उपचार गर्न सफल भयौं । एकदम खुशी लागेको छ ।’

जन्मेका बेला बच्चाको तौल ९ सय ग्राम थियो । करिब एक महिनाको उपचारपछि बच्चाको तौल १ दशमलव ३ किलोग्रामको भएको छ ।

सीमाको कलिलो उमेरमै विवाह भएर गर्भ बसेका कारण यस्तो स्थिति आएको चिकित्सकले बताए । डा। साहले भने– सीमाको १५र१६ वर्षमै विवाह भएको रहेछ । विवाहलगत्तै गर्भ बसेछ । सानै उमेरमा गर्भवती भएकाले पिसावमा इन्फेक्सन भएका कारण कारण सात महिना नलाग्दै बच्चा जन्मेको हो ।

सात महिना नपुग्दै बच्चा जन्मेकाले आगामी दिनमा पनि समस्या आउन सक्ने चिकित्सकले बताएका छन् । डा। इसाराजुम भन्छन्– यस्तो अवस्थामा बच्चाको मुटु कमजोर हुन्छ । त्यसैले पनि समस्या हुन सक्छ । थोरै समस्यामा र एक केजीभन्दा कम तौलका बच्चा जन्मिँदा पछि आँखा नदेख्ने खतरा हुन्छ ।

नियमित जाँच गर्न चिकित्सकले सीमालाई सुझाव दिएका छन् ।

प्रकशित मिति : 2021-02-08