न्यूजमधेश डेस्क
वीरगञ्ज ,३० माघ । अस्पताल प्रशासनको लापरवाहिका कारण अहिले वीरगञ्जस्थित नारायणी अस्पताल अस्तव्यस्त बन्दै गएको छ ।

अस्पतालमा रहेको सीटी स्क्यान, एक्सरे जस्ता सेवा व्यवस्थित नगर्दा उपचारका लागि अस्पताल आएका विरामी चर्को शुल्क तिरेर बाहिरबाट सेवा लिन बाध्य बनेका छन् ।

निजी क्षेत्रबाट सञ्चालित सीटी स्क्यान तथा एक्सरे सेन्टरबाट अस्पताल प्रशासनलाई कमिशन आउने गरेकोले अस्पतालमा रहेको अत्याधुनिक मेसिन बनाउनेतर्फ चासो नदिएको श्रोतको दाबी छ ।

यस्तै सरकारले गएको ६ महिना अघि नै पठाएको अत्याधुनिक ४ थान आईसीयू बेड प्रयोगमै नल्याई अस्पताल हाता बाहिरै बेवारिसे पारेर फालिएको छ ।

आईसीयूलाई सुविधासम्पन्न र व्यवस्थित बनाउन ३ करोड रुपैयाँ आएको भएपनि अहिलेसम्म काम हुन सकेको छैन । गएको ६ महिनादेखि अस्पतालको नेतृत्व गरिरहेका मेडिकल सुपरिटेण्डेन्ट डा। सञ्जयकुमार ठाकुर कर्मचारी नियुक्ति र बाहिरि कमिशन खानमै व्यस्त बन्दा अस्पताल अस्तब्यस्त बन्न थालेको अस्पतालकै कर्मचारीहरु बताउँछन् ।

अस्पतालमा आएका विरामीले सुलभ सेवा प्राप्त गर्नु पर्नेमा सीटी स्क्यान, एक्सरे जस्ता आवश्यक सेवा नै पाउँनबाट वञ्चित हुनु परेको छ । यसले कम शुल्कमा उपचार हुने ठानेर ग्रामिण क्षेत्रबाट आउने विपन्न तथा निम्न आय भएका विरामीलाई उपचारको पहुँच पाउन कठिन बनाइदिएको छ ।

सीटी स्क्यान तथा एक्सरेका लागि निजी संस्थामै पुग्नु परेपछि कम खर्चमै नारायणी अस्पतालमै उपचार होला भनेर गाउँगाउँबाट आएका विरामी उपचार नै नगरी घर फर्कन बाध्य हुनु परेको छ ।

यस्तै सरकारले विपन्न तथा निम्न आय भएका व्यक्तिले सत प्रतिशत छुटमा इमर्जेन्सी सेवा पाउने भनेको भएपनि नारायणी अस्पतालले हरेकसँग शुल्क उठाइरहेको छ ।

विपन्न तथा निम्न आय भएकाहरुको नाममा आउने सेवा भने अस्पतालका मेसु डा। ठाकुरले कागज मिलाएर लिने गरेको अस्पतालकै कर्मचारी दाबी गर्छन् ।

त्यस्तै कोभिडका बेला प्रसुती, सर्जिकल तथा मेडिकल वार्डको क्षमता जति थियो अहिलेपनि त्यसमा बृद्धि गरिएको छैन । अहिले उपचारमा आउनेको संख्या दिनहुँ बढीरहे पनि मेसु डा। ठाकुर भने क्षमता बृद्धि गर्ने तर्फ कुनै चासो देखाइरहेका छैनन् ।

उनले आफू निकटका कर्मचारीलाई काखि च्यापेर नियम विपरित विभिन्न फाँटको नेतृत्व दिने गरेको भेटिएको छ ।

सामाजिक सुरक्षा योजनाको नेतृत्वमा पनि डा। ठाकुरले आफू अनुकुल व्यक्ति राखेका छन् । हरेक फाँटमा आफू निकट व्यक्तिलाई मात्रै प्रश्रय दिएर सबै फाँटबाट अकुत कुम्ल्याउने योजनामा लाग्दा अस्पतालको सेवा सुविधा भने खस्कँदै लथालिङ्ग अवस्थामा पुगेको छ ।

गएको केही समयअघि जिल्ला प्रशासन कार्यालय पर्साले गरेको छड्के जाँचमा समेत अस्पताल प्रमुखको लापरबाही बाहिरिएको थियो ।


हाम्रो बारेमा

ताजा र खोजमूलक समाचार, विचार, विश्लेषण र अन्तर्वार्ता निरन्तर सम्प्रेषण गर्दै जानेछ । राष्ट्रियता, लोकतन्त्र, नागरिक अधिकार, सुशासन र प्रेस स्वतन्त्रताका सवालमा कहिल्यै कसैसँग सम्झौता गर्ने छैन ।  अनलाइन पत्रिकाको रुपमा निरन्तर सुचना प्रवाहमा जागरुक रहन्छ ।

हाम्रो समुह

प्रकाशक  :मनोज कुमार मोरबैता
सम्पादक : मनोज बनैता
वरिष्ठ सल्लाकार : बिपी साह
वरिष्ठ सल्लाकार : श्रवण देव
वरिष्ठ सल्लाकार : सन्तोष जादब

सम्पर्क

सम्पर्क कार्यालय :जनकपुरधाम ( भानु चौक )
सम्पर्क : ९८४४५२०३२० ,९८०७७४९०००
ईमेल : [email protected]

Copyright © 2018-2021 News Madhesh