मनोज मोरबैता
जनकपुरधाम ,१० बैशाख । पछिल्लो समय जताततै स्थानीय तहमा तालाबन्दी हुने क्रम बढेको छ । जनताको सबैभन्दा नजिकको निकायको रुपमा रहेको स्थानीय तहमा हुने तालाबन्दीका कारण सेवाग्राहीले सास्ती पाउने गरेका छन् । त्यस्तै स्थानीय विकासका योजनाहरु समेत अवरुद्ध हुने गरेका छन् ।
यता धनुषाको कमला नगरपालिकामा विभिन्न वडाका चार जना वडाअध्यक्षहरुले कार्यालयमा तालाबन्दी गरेपछि सेवाग्राही मर्कामा परेका छन् । विगत ५ दिनदेखि नगरपालिकामा गरिएको तालाबन्दीका कारण सेवाग्राही मात्र नभई नगरक्षेत्रभित्रकै सम्पूर्ण कामकाज समेत ठप्प हुँदा स्थानीय चिन्तित बनेका हुन् ।
तालाबन्दीका कारण नगरपालिकाबाट सञ्चालित योजनाको काम प्रभावित हुनुका साथै काम विशेषले आउने सेवाग्राही रित्तै हात फर्किन बाध्य भएका छन् । नगरपालिकाका नगरप्रमुख र निमित्त प्रमुख प्रशासकीय अधिकृत र लेखापालले वडाको योजना कटौती गरेको भन्दै ४ जना तत्कालीन संघीय समाजवादी पार्टीबाट निर्वाचित वडा अध्यक्षहरुले नगरपालिकामा तालाबन्दी गरेका हुन् ।
यता सेवाग्राहीले भने भागबण्डा नमिलेकै कारण नगरपालिकामा तालाबन्दी गरेको आरोप लगाएका छन् । एक जना सेवाग्राहीले भने, ‘तिन वर्षदेखि ती वडा अध्यक्षहरु कहाँ थिए । अहिले भागबण्डा नमिलेपछि नगरपालिकामा तालाबन्दी गर्न पाईन्छ ?’, उनले भने हामी सोमबारदेखि नै नगरपालिकामा काम गराउनको लागि दौरधुप गर्दैछौं । तर नगरपालिकामा तालाबन्दीका कारण काम हुदैन उनले दुःख व्यक्त गरेका हुन् ।
नगरपालिकामा तालाबन्दी गरेर वडा अध्यक्षहरुले जनतालाई दुःख दिने काम मात्र गरेको अर्का स्थानीय सेवाग्राहीले भने, ‘हेर्दै जानुस्, यिनीहरुको कहाँ भागबण्डा मिलेको छैन । मिलेपछि ताला आफै खुल्छ ।’ हामी यिनीहरुको नौटंकी हेरेर बस्नु पर्ने, हामीले चै हैरानी खेप्नु पर्ने ? उनले प्रश्न गरे ।
उनले छिटो भन्दा छिटो तालाबन्दी नखोले स्थानीयले नै तालाबन्दी फुटाउन बाध्य हुने पनि बताए ।
