न्यूजमधेश डेस्क
जनकपुरधाम,१६ बैशाख । धनुषाका एक युवा एवं विद्यार्थी नेताले आफ्नो जन्मदिनमा बालबालिकालाई शैक्षिक समाग्री वितरण गरेका छन् ।
पछिल्लो समयमा जन्मदिन मनाउने नाममा हजारौं रुपैयाँ खर्चिने, महंगो केक काट्ने, साथीभाई जम्मा गरि भोजभत्तेर समेत आयोजना गरी फजुल खर्च गर्ने क्रम बढी रहेकै बेला जिल्लाको विदेश नगरपालिकाका एक युवा नेताले भने आफ्नो जन्मोत्सवमा सामाजिक भावना बालबालिकालाई शैक्षिक सामाग्री बाँडेका छन् ।
विदेह नगरपालिका ५ निवासी अखिल नेपाल राष्ट्रिय स्वतन्त्र विद्यार्थी युनियन(अनेरास्ववियू) का केन्द्रीय सचिव एवं नेकपा युवा नेता राजकिशोर रोहिताले आफ्नो जन्मदिनको अवसरमा विदेह स्थित तिनाकौरीया एकेडेमीमा अध्ययनरत बालबालिकालार्ई शैक्षिक सामाग्री वितरण गरेका हुन् ।
विद्यार्थीको शैक्षिक विकासका लागी जन्मदिनको खर्च कटाएर केही शैक्षिक सामाग्री हस्तान्तरण गरेको रोहिताले बताए ।
विद्यालयमा अध्ययनरत नर्सरीदेखि कक्षा पाँच सम्मका एक सय १ जना विद्यार्थी बालबालिकालाई उनले कापी, कलम र माक्स हस्तान्तरण गरेका हुन् । आफुले सामाजिक सेवाको भावना राख्दै विद्यालयमा विद्यार्थीको आकर्षण बढाउने उद्देश्यले शैक्षिक सामाग्री प्रदान गरेको नेता रोहिताले बताए ।
पछिल्लो समय जन्मदिन लगायतका शुभोत्सवमा हुने फजुल खर्च कटौती गरी सामाजिक काममा लगाउन सके समाज र राष्ट्रको विकासमा टेवा पुग्ने उनले बताए ।
उनले कोरोना माहामारीबाट बच्न आवश्यक स्वास्थ्यमापदण्डको पालना गर्न समेत बालबालिकासहित सबैमा आग्रह गरेका छन् ।
