न्यूजमधेश डेस्क
काठमाडौं ,३ जेष्ठ । जनता समाजवादी पार्टी (जसपा) नेपालका अध्यक्ष उपेन्द्र यादव सत्ताबाट बाहिरिएको धेरै भयो । यो बिचमा उनी सत्ता परिवर्तनको खेलमा डटेर लागे । केपी ओलीसँग पनि सत्ताका लागि प्रयास नगरेका होइन । ओलीसँगै वा ओली हटाएर सत्तामा जाने उनको अर्जुन दृष्टि असफल रह्यो । सत्तामा बाहिरिएको र सत्ताको खेल सकिएपछि उपेन्द्र अब नयाँ फण्डामा लागेका छन् । यहीँ ओली सरकारमा हुँदा विदेश भ्रमण र आफ्नो स्वार्थको रोटी सेकेका उपेन्द्रलाई समावेशी सिद्धान्तको सम्झना भएको छ ।
सरकारमा हुँदा जातका आधारमा यादवलाई मात्रै च्यापेका उपेन्द्रले अहिले सत्ता बाहिर रहँदा ओली सरकारले समावेशी सिद्धान्त उल्लंघन गरेको देखे । अनि विज्ञप्ति जारी गरे । ओलीले मधेस आन्दोलनका राजबन्दीलाई छोडेको, मुद्दा फिर्ता लिएको, वर्षोदेखि सत्ताबाट ठगिएको मधेसका मुद्दा सम्बोधनमा लगेको देखिसहेनन् । त्यसको प्रचार प्रसार गरेनन् । तर उनले राजदूत लगायत नियुक्तिमा समावेशिता खोजे । समावेशिता लागु हुँदा आफूलाई पनि भागवण्डा पर्ने उनको आश होला । हुन त आफू परराष्ट्रमन्त्री हुँदा उनलाई समावेशिताको याद आएन । तर अहिले सत्ता बाहिरको छटपटि उनले अनेक बहानामा पोख्न थालेका छन् ।
आइतवार जारी गरेको विज्ञप्तिमा उनले राजदूत नियुक्तिमा समावेशी सिद्धान्त र मापदण्ड कार्यान्वयन गर्न माग गरेका छन् । विज्ञप्तिमा नेपालको संविधानको धारा २८२ र २८३ मा समावेशी सिद्धान्तबमोजिम राजदूतहरू नियुक्ति गर्नुपर्ने व्यवस्था भएकोमा पटक(पटक राजदूतहरू नियुक्ति गर्दा समावेशी आधारमा नगरेको र त्यस्को मापदण्ड समेत उल्लङ्घन भएको उल्लेख छ।
‘यस्ता राजनीतिक नियुक्तिहरूमा वर्तमान सरकारले मधेशी, आदिवासी जनजाति, महिला, दलित, थारु लगायतका समुदायहरूको संविधानको व्यवस्था विपरित न्यून प्रतिनिधित्व गराई उपेक्षा र विभेद गरेको छ,’ विज्ञप्तिमा भनिएको छ, ‘अतः राज्यका सबै अंग, तह र निकायमा समानुपातिक समावेशी मान्यता तथा त्यस सम्बन्धी मापदण्डका आधारमा नियुक्ति गर्न माग गर्दछु।’
यादवले प्रधानमन्त्री ओलीको सपथ बदर गराउन पनि माग गरेका छन् । राष्ट्रपतिले उच्चारण गराएको शब्द उच्चारण नगर्नुले पदको मर्यादा र गरिमामा गम्भीर आँच पुगेकोले उक्त शपथग्रहण बदर गरी पुनः शपथग्रहण गर्न गराउन यादवले माग गरेका छन् । शुक्रवार प्रधानमन्त्रीको सपथग्रहणमा राष्ट्रपति विद्यादेवी भण्डारीले वाचन गरेको सत्यनिष्ठापूर्वक प्रतिज्ञा गर्दछु भन्ने वाक्यांशमा प्रतिज्ञा गर्दछु नभनी ुसत्यनिष्ठापूर्वक त्यो पर्दैनु भनेर शपथग्रहण गरेकाले यसले देशको राष्ट्रपति र प्रधानमन्त्री पदको मर्यादा र गरिमामा गंभीर आँच पुगेको विज्ञप्तिमा उल्लेकख छ ।
