न्यूजमधेश डेस्क
जनकपुरधाम ,४ जेष्ठ ।कोरोना माहामारीका कारण लगाइएको निषेधाज्ञाले यतिबेला धनुषासहित देशभरकै जनजीवन नराम्ररी प्रभावित भई रहेको छ । गत वर्षको कोरोना लहरका कारण लगाइएको लकडाउनका कारण बल्ल तल्ल बाँचेका सर्वसाधारणलाई यसपटकको निषेधाज्ञामा मरिएला भन्ने पीरलो छ ।
दैनिक ज्याला मजदुरी गरिखाने वर्ग र सडकमा मागेर पेटपाल्नेहरुलाई समेत जिवन गुजार्न धौ धौ भएको छ ।
हुन त निषेधाज्ञाका कारण पेटभरी खान नपाएकाहरुका लागि विभिन्न व्यक्ति तथा संघसंस्थाले निःशुल्क खानाको प्रवन्ध गर्ने गरेको भएपनि त्यो पर्याप्त हुन सकेको छैन । अझै धेरै मानव रोगसँग भन्दा पनि भोकसँग लडिरहेका छन् । तिनै भोकसँग लडिरहेका जनकपुरधाममा मागेर खानेहरुका लागि निःशुल्क खानाको व्यवस्था गरिएको छ ।
जनकपुरधाम उपमहानगरपालिका–७ स्थित जमिरिया देवी धर्मशालालाई बासस्थान बनाउँदै जनकपुरधाममा मागेर खानेहरुका लागि वडाध्यक्ष जानकीराम साहले आइतबारदेखि खाना खुवाउने अभियान सञ्चालन गरेका छन् । वैशाख २१ गतेदेखि धनुषामा लागेको निषेधाज्ञाका कारण धर्मशालामा आश्रित ४० जना भोकै हुने अवस्था आएको भन्दै उनीहरुलाई निषेधाज्ञा अवधिभर निःशुल्क खानाको व्यवस्था गरिएको वडा अध्यष साहले बताए ।
‘धर्मशालामा बसोबास गर्दै आएका कुष्ठ रोगी, मजदुर तथा सडकमा मागेर खानेहरुलाई राहतस्वरुप दुई छाक भोजनको व्यवस्था गरेको छु ।’ वडा अध्यक्ष साहले भने, ‘वडामा कसैले पनि भोकै बस्न नपरोस भन्ने उदेश्यले उनीहरुलाई खानाको व्यवस्था गरेको हुँु, यदि निषेधाज्ञाको समयमा वडाभित्र कोही भोकै छन्, खान पाएका छैनन् भने मलाई सम्पर्क गर्दा हुन्छ ।’
