मनोज यादव
सर्लाही,४ जेष्ठ ।प्रदेश २ का सर्लाहीमा प्रहरीले जिल्लाको इश्वरपुरबाट हतियार देखाएर लुटपाट गर्ने दुईजना डाँकाहरुलाई पक्राउ गरेको छ ।
जिल्ला प्रहरी कार्यालय सर्लाहीका प्रवक्ता एवं डिएसपी मदन कुवँरका अनुसार पक्राउ पर्नेमा इश्वरपुर नगरपालिका वडा न–५ बस्ने ३३ वर्षीय रामकरण महतो र सोही ठाउँ बस्ने २० वर्षीय सुरेन्द्र सदा रहेका छन् ।
उनीहरूलाई गत बैशाख २६ गते बिहानको राती अन्दाजी करिब सवा १ बजेको समयमा इश्वरपुर न.पा वडा न–४ स्थित पुर्व पश्चिम लोकमार्गमा हतियार देखाएर दुईवटा ट्रक र एउटा पिकअप गाडीको चालक र सहचालकहरुबाट नगद ३७ हजार, विभिन्न कम्पनीको मोबाइल सेट –५ थान र सुनको हनुमानी(लकेट)– १ थान लगायतका सामानहरु लुटेको आरोपमा बैशाख ३० गते बिहिवार पक्राउ गरेको हो ।
पक्राउ परेका उनीहरूको साथबाट प्रहरीले एक थान नलकटुवा बन्दुक, त्यसमा लाग्ने दुई राउण्ड गोली, सुनको हनुमानी–१ थान, मोबाइल सेट २ थान , बिआरथर्टीयू ७७३ नम्बरको भारतीय मोटरसाइकल र टल्कने ज्याकेट बरामद भएको छ ।
पक्राउ परेका दुवै डाँकाहरुलाई जिल्ला अदालत सर्लाहीबाट १० दिनको म्याद थप गराई हिरासतमा लिएर थप अनुसंधान सुरु गरिसकेको प्रवक्ता एवं डिएसपी कुवँरले जानकारी दिएका छन् ।
