कमलेश ठाकुर
जनकपुरधाम,६ जेष्ठ । महोत्तरीको जलेश्वर अस्पतालमा दक्ष जनशक्ति अभावमा कोरोना संक्रमितको उपचारमा कठिनाई भइरहेको थियो । दक्ष चिकित्सककै अभावमा भेन्टिलेटर थन्काइएको थियो भने बिरामीहरु उपचार अभावमा छट्पटाइरहेका थिए ।
प्रदेश सरकारले चिकित्सकको व्यवस्थापन गर्न बैशाख २७ गते डा. शैलेन्द्र कुमार यादवलाई जलेश्वर अस्पतालमा पठाउने निर्णय ग¥यो । प्रादेशिक अस्पताल जनकपुरधाममा कार्यरत एनेस्थेसिया डा. यादवलाई प्रदेश २ का सामाजिक विकास मन्त्रालयले तत्काल अर्को व्यवस्था नभए सम्म जलेश्वर अस्पताल महोत्तरीमा भेन्टिलेटरमा काजमा खटाएको पत्राचार गरे ।
मन्त्रालयका शाखा अधिकृत रामहृदय यादवले बैशाख २६ गते नै पत्र पठाएका थिए । तर डा. यादव अहिलेसम्म अस्पतालमा हाजिर नभएको जलेश्वर अस्पताल विकास समितिका अध्यक्ष सुरेश पाण्डेले जानकारी दिए । बैशाख २८ गते सोही अस्पतालमा मन्त्रालयले पुनः दुईजना चिकित्सकलाई काजमा खटायो । तर, मन्त्रालयलाई चिकित्सकले टेरेनन् । मन्त्रालयले प्रादेशिक अस्पतालमै कार्यरत फिजिसियन डा. रवि प्रधान र मेडिकल अधिकृत डा. सन्तकुमार यादवलाई जलेश्वर काजमा खटाएको थियो ।
चिकित्सक अभावमा अस्पतालका बिरामीहरु जोखिममा रहेको भन्दै विकास समितिका अध्यक्षले गत वर्षदेखि नै मन्त्रालयलाई डाक्टर पठाउन अनुनय गरिररहेको बताए । नयाँ भेरियन्टसहित दोस्रो लहर सुरु भएपनि चिकित्सक नआएको भन्दै उनले जेठ ५ गतेदेखि अमरण अनसन बस्ने घोषणा गरेका थिए । मन्त्रालयको आश्वासनपछि अनसन नबसेको उनले आफ्नो फेसबुकमार्फत जनाएका छन् । मन्त्रालयले उनलाई पुनः छिटै चिकित्सक पठाउने आशवासन दिएको छ ।
अस्पतालमा चिकित्सक नपुगेपछि उपचाररत कोभिडका विरामीहरु भने समस्यामा परेका छन् । अस्पतालमा ५ भेन्टिलेटर छ, तर दक्षजनशक्ति नभएपछि प्रयोगविहीन अवस्थामा थन्किएको छ । त्यहाँका विरामीको अवस्था बिग्रिएर भेन्टिलेटरको आवश्यता परेमा बाहिर पठाउने गरेको अस्पतालले जनाएको छ ।
