न्यूजमधेश डेस्क
जनकपुरधाम ,६ जेष्ठ । बुधबार नवलपरासीमा प्रहरीको गोली लागेर ज्यान गुमाएका युवकको दोषीमाथि कडा कारबाहीको जनमत पार्टीका राष्ट्रिय अध्यक्ष डा सीके राउतले माग गरेको छ ।
सीमाक्षेत्रको अस्पतालबाट आफ्नो बुवाको लागि अत्यावश्यक औषधी किन्न गएका नवलपरासी प्रतापपुर गाउँपालिका ६ का २२ वर्षीय अविनाश राजभरलाई प्रहरीले सिधै गोलि हानेर हत्या गरेको प्रति जनमत पार्टीको गम्भीर ध्यानाकर्षण भएको छ ।
विहिबार विहान जनमत पार्टीका राष्ट्रिय अध्यक्ष डा सीके राउतले एक विज्ञप्ति जारी गर्दै मृतकको परिवारलाई ५० लाख रुपैयाँ सहयोग उपलब्ध गराउन सरकारसँग जोरदार माग गरेको छ ।
डा राउतले विज्ञप्तिमा भनेका छन्, अविनाश राजभरलाई नेपालका सशस्त्र प्रहरीले सीधै गोली हानेर गरेको नश्लीय हत्याप्रति पार्टीको गम्भीर ध्यानाकर्षण भएको छ । सोको निष्पक्ष छानबिन गरी दोषीमाथि कडा कारबाही गर्न तथा मृतकको परिवारलाई ५० लाख रुपैयाँ सहयोग स्वरुप उपलब्ध गराउन जनमत पार्टी माग गर्दछ ।
त्यसैगरी डा राउतले जारि गरेको विज्ञप्तिको २ नम्बरमा यस्तो लेखेका छन् – “कोभिड- १९को दोस्रो लहरसँग जुझ्न नेपाल सरकारद्वारा गरिएको बंदाबंदी र जारी गरिएको निषेधाज्ञाको अवधि अधिकांश ठाउँमा झण्डै एक महिना पुग्न लाग्दा सो अवधिभर बहुसंख्यक गरीब, मजदूर तथा दैनिक ज्यालादारहरू काम गर्न बाहिर निस्कन सकेका छैनन् र उनीहरूको परिवार घरमा खानाको समस्या तथा भोकमरीसँग जुझ्दैछन्।”
उनीहरू घरबाहिर अत्यावश्यक कामले निस्के पनि प्रहरीको दमन र जरीवाना खेप्नु परेको डा राउतले सो विज्ञप्तिमा उल्लेख गरेको छ ।
राहतको आवश्यकता रहेका सम्पूर्ण घरपरिवारका लागि सरकारद्वारा राहतको अविलम्ब व्यवस्था गर्न जनमत पार्टी माग समेत गरेका हुन् ।
