न्यूजमधेश डेस्क
रौतहट ,१२ जेष्ठ । अघिल्लो सालको बन्दाबन्दीको पीडा सेलाउन नपाउँदै फेरि निषेधाज्ञा र लकडाउन सुरु भएपछि रौतहटका होटल मजदुर, यातायात मजदुर ई–रिक्साचालक तथा ठेलाचालकको चुल्लो नबल्ने अवस्था आएको छ । बस चल्न नपाएका कारण चन्द्रनिगाहपुर गौर रोडमा चल्ने बसका मजदुरलाई दुई छाक खान पनि धौधौ परेको उनीहरूको गुनासो रहेको छ ।
दिनभरि चन्द्रनिगाहपुर र गौरमा ठेला चलाएर घर चलाउँदै आएका ठेला मजदुरले समेत काम अभावमा खान समस्या भएको गुनासो गरेका छन् । जिल्लाका विभिन्न स्थानमा ई–रिक्सा चलाएर जीवन चलाउँदै आएकाहरूको घरमा खाने चामल नभएर चरम समस्या आएको रिक्साचालक केदारप्रसाद तिमल्सिनाले बताए ।
चन्द्रनिगाहपुर–गौर सडकखण्डमा विगत लामो समयदेखि सवारीचालकको काम गर्दै आएका सञ्जीव यादवले बस थन्केका कारण परिवारलाई खुवाउन समस्या परेको गुनासो गरे । ‘दिनभरि बस चलाएर साँझ भत्ता ल्याएर चामल, तरकारी किनेर खाने हामी मजदुर लकडाउन र निषेधाज्ञाले ठूलो समस्यामा परेका छौँ, हाम्रो समस्या हेर्ने कोही भएन,’ उनले गुनासो गरे ।
रौतहट जिल्लाको चन्द्रनिगाहपुरबाट लामो तथा छोटो दूरीका गरी ७२ भन्दा धेरै बस जिल्लाभरि चल्ने गरेकामा अघिल्लो सालदेखिको बन्दाबन्दीले सेवा बन्द भएसँगै ती बसमा काम गर्ने मजदुरका परिवारमा खाद्यान्न अभाव रहेको रौतहट बस व्यवसायी सेवा प्रालि चन्द्रनिगाहपुरका इन्चार्ज शैलेश गिरीले बताए । रौतहट बस व्यवसायी सेवा प्रालिमा आबद्ध करिब तीन सय यातायात मजदुर कोरोना कहरले भन्दा खान नपाएर समस्याले मर्ने अवस्थामा पुगेको भए पनि त्यसतर्फ सम्बन्धित निकायले चासो नदिएको गिरीको भनाइ छ ।
दिनभरि काम गरेर कमाएर ल्याएको पैसाले परिवार पाल्दै आएकोमा पछिल्लो समयको बन्दाबन्दीका कारण परिवार पाल्न धेरै समस्या भएको चन्द्रनिगाहपुरका अर्का बस मजदुर वीरेन्द्र पटेलले बताए । गौर– काठमाडौंं चल्ने आफ्नो बस चलाउन नपाउँदा राखैकै ठाउँमा बसको टायर र बडी नै कुहिने अवस्थामा पुगेको र बैंकको ब्याजसमेत तिर्न नपाएको धुम थ्री नामको बसका सञ्चालक दीपक तिमल्सिनाको गुनासो छ ।
उनले राज्यले निषेधाज्ञा लकडाउनको विकल्प खोजेर यातायात सञ्चालनको व्यवस्था गरे आफूहरूले राहत पाउने बताए । बन्दाबन्दीका कारण बस मजदुरजस्तै समस्यामा रौतहटमा ठेला चलाएर जीविका चलाउने मजदुरहरू पनि परेका छन् । ठेला चलाएर जीविका चलाउँदै आएका मोहमद सम्सुल हक बन्दाबन्दीका कारण परिवार पाल्न समस्या भएको बताउँछन् । जिल्लाको चन्द्रनिगाहपुर क्षेत्रमा रहेका साना तथा ठूला होटेल बन्द हुँदा ती होटेलमा काम गर्ने मजदुरको रोजगारी नै गुमेको छ ।नयाँ पत्रीकामा छापिएको छ
