न्यूजमधेश डेस्क
काठमाडौं ,१५ जेष्ठ । भारतको सत्तारुढ भारतीय जनता पार्टी(भाजपा) विदेश विभाग प्रमुख विजय चौठाइवालेले जनता समाजवादी पार्टी (जसपा) का संघीय परिषद अध्यक्ष बाबुराम भट्टराई आफ्नो असफलताका लागि अरूलाई दोष दिइरहेको टिप्पणी गरेका छन्।
चौठाइवालाले अन्य कम्युनिस्टजस्तै आफ्नो असफलताका लागि बाबुरामले अरूलाई दोषारोपण गरिरहेको बताएका हुन्।
नेपालको घरेलु राजनीतिमा कुनैपनि कुरा गर्न स्वतन्त्र रहेपनि आरएसएस र भारतबारे भट्टराईले टिप्पणी गर्नु उपयुक्त नरहेको उनको भनाइ छ। अझै जवाहरलाल युनिभर्सिटी (जेएनयु) मै बसिरहेको भट्टराईलाई लागेको चौठाइवालेले बताएका छन्।
‘नेपालको घरेलु राजनीतिमा कुनैपनि कुरा गर्न उहाँ स्वतन्त्र हुनुहुन्छ,’ चौठाइवालेले सामाजिक सञ्जाल ट्विटरमा लेखेका छन्,‘आरएसएस र भारतबारे उनको टिप्पणीले उनी अझै पनि जेएनयुमा बसिरहेको देखाउँछ। सामान्य डाइ–हार्ड कम्युनिस्टजस्तै बाबुरामजी सबैजनालाई आफ्नो असफलताका लागि दोषारोपण गरिरहनु भएको छ।’
