न्यूजमधेश डेस्क
जनकपुरधाम ,२९ जेष्ठ । प्रदेश २ सरकारका नवनियुक्त भौतिक पूर्वाधारमन्त्री रामसरोज यादवले धनुषाको मुखियापट्टी मुसहरनिया गाउँपालिकामा पोखरीमा डुबेर ज्यान गुमाएका बालिकाहरूको परिवारलाई राहत उपलब्ध गराउने घोषणा गरेका छन्।
मन्त्री यादवले प्रत्येक पीडित परिवारलाई भौतिक पूर्वाधार विकास मन्त्रालयको तर्फबाट १/१ लाख रूपैयाँ उपलब्ध गराउने घोषणा गरेका हुन्।
यादवको निर्वाचन क्षेत्रसमेत रहेको मुखियापट्टी मुसहरनिया गाउँपालिका–६ लक्ष्मीपुरस्थित एक खेतमा नयाँ खनिएको पोखरीमा डुबेर शुक्रबार पाँच बालिकाको एकैसाथ मृत्यु भएको थियो।
मन्त्री यादवले बेलाबखत भइरहने यस्ता घटनाप्रति गम्भीर रहेको बताउँदै तराई–मधेशमा रहेका अव्यवस्थित पोखरीलाई सुरक्षित बनाउन हरसम्भव प्रयास गरिने बताएका छन्।
