न्यूजमधेश डेस्क
जनकपुरधाम,५ असार। जनता समाजवादी पार्टी (जसपा) नेपालका सांसद रुही नाज दम्पतीमाथि आक्रमण भएको छ ।
सर्लाहीबाट निर्वाचित संघीय सांसद नाज र उनका श्रीमानमाथि शुक्रवार सांघातिक हमला भएको हो । आक्रमणबाट सांसद नाजका श्रीमानको टाउको फुटेको छ ।
उनको ज्यान लिने प्रयास गरिएको पीडित परिवारले बताएको छ । सांसद नाजका सहयोगीका अनुसार उनीहरुमाथि जसपाका शीर्ष नेता महेन्द्रराय यादव निकट युवाहरुले हमला गरेका हुन् । गम्भिर घाइते नाजका पतिको अहिले उपचार भइरहेको छ । आक्रमण गर्ने दुई जनालाई प्रहरीले नियन्त्रणमा लिएको छ ।
महेन्द्रराय यादव अहिले जसपामा प्रथम अध्यक्ष महन्थ ठाकुरलाई छोडेर यादव थरको जातीय सेन्टिमेन्टसँग जोडिँदै उपेन्द्र यादवको कित्तामा पुगेका छन् । उपेन्द्र यादवले महन्थलाई हटाएर पार्टी कब्जा गर्ने रणनीति लिएका छन् । ठाकुर समूहका मान्छे तानेर आफू बहुमतमा पुग्ने र पार्टी कब्जा गर्ने उपेन्द्रको रणनीति सफल हुन सकेको छैन । संसदीय दलमा र अहिले आएर कार्यकारिणीमा समेत ठाकुर समूहको बहुमतले उपेन्द्र पुरै अल्पमतमा परेका छन् । यस्तोमा ठाकुर समूहलाई साथ दिने सांसदमाथि दबाब बढाउन उपेन्द्र समूह आक्रमणमा उत्रिएको छ ।
विगतमा पूर्वसमाजवादी पार्टीबाट निर्वाचित सांसद नाज अहिले ठाकुर समूहतिर लागेकी छन् । जसरी पूर्वराजपाबाट निर्वाचित महेन्द्र राय यादव उपेन्द्र समूहतिर लागे त्यसैगरी रुही नाज ठाकुर समूहतिर लागिन् । महेन्द्रराय उपेन्द्रतिर लाग्दा ठाकुर समूहले केही भनेन । उनको निर्णयलाई स्वीकार गरयो । तर रुही नाजले आफ्नो निर्णय गरेर कित्ता परिवर्तन गर्दा उपेन्द्र समूह धम्क्याउने र कुटपिट गरेर मनोवैज्ञानिक त्रास दिएर गुण्डागर्दीमा उत्रिएको छ । जसपा यादव समूह स्रोतका अनुसार उपेन्द्र यादवको निर्देशनमा महेन्द्ररायका मान्छेले सांसद नाज दम्पतीमाथि हमला गरेका हुन् । महेन्द्रले रुही पनि आफूसँगै उपेन्द्र समूहमा नलागेको भन्दै आक्रमण गराएको बताइएको छ ।
यसअघि पनि महेन्द्ररायका मान्छेले रुहीलाई धम्क्याउने, गाली गर्ने, डर, त्रास देखाएर दबाब दिँदै आएका छन् । राजनीतिक रुपमा पकड कमजोर भएपछि गुण्डागर्दीमा उत्रिएर पार्टीमा बहुमत पुर्याउने हर्कतमा उपेन्द्र समूह लागेको छ । यसको उचित प्रतिवाद गरिने ठाकुर समूहका नेताहरुले बताएका छन् ।
