न्यूजमधेश डेस्क
काठमाडौं ,६ असार । पशुपतिनाथ मन्दिर परिसरमा राम मन्दिर निर्माण हुने भएको छ। संस्कृति पर्यटन तथा नागरिक उड्डयनमन्त्री उमाशंकर अरगरियाले आइतवार उक्त मन्दिरको शिलान्यास गरेका छन्।
शिलन्यासपछि मन्त्री अरगरियाले पुननिर्मित राम मन्दिरले धार्मिक पर्यटनमा थप टेवा पुग्ने बताए। उनले समयमै निर्माण कार्य सम्पन्न गर्न पनि निर्देशन दिए।
मन्दिर पुरातत्व विभागको मापदण्डअनुसार परम्परागत शैलीमा बन्ने जानकारी दिँदै मन्त्री अरगरियाले युनेस्कोको विश्व सम्पदा सूचीमा परेको सम्पदाको कुनै संरचनागत परिवर्तन नहुने बताए।
साधुसन्तको सुरक्षालाई ख्याल गरेर निर्माण हुने बताउँदै कसैलाई पनि अवहेलना र निकालिने वातावरण अन्त्य गरिने उनको भनाइ थियो।
भूकम्पबाट क्षतिग्रस्त मन्दिरको पुनर्निर्माणका लागि काम सुरु भएको छ। ७ करोड लगानीमा आगामी अढाई वर्षभित्र सक्नेगरी राम मन्दिरको पुनर्निर्माण कार्य सुरु भएको पशुपति क्षेत्र विकास कोषले जनाएको छ।
कोषका पदाधिकारी, साधुसन्त र भक्तजन सहभागी शिलान्याश कार्यक्रममा कोषका सदस्य सचिव डा प्रदीप ढकालले मन्दिर निर्माणको काम समयमै सक्ने प्रतिबद्धता जनाए।
सो अवसरमा मन्त्री अरगरियाले पशुपति क्षेत्र विकास कोषको निरीक्षण गरेका थिए। कोषका अध्यक्षसमेत रहेका मन्त्री अरगरिया कार्यकारी निर्देशक डा घनश्याम खतिवडा र सदस्य सचिव ढकालका साथमा निरीक्षण गरेका हुन्।
मन्त्रालय र कोष मिलेर पशुपति विकास कोषलाई पर्यटकीय र विकासका हिसाबले व्यवस्थित बनाउन काम गर्नुपर्ने धारणा मन्त्री अरगरियाले निरीक्षणका क्रममा राखे। निरीक्षणका क्रममा उनले पशुपति नाथ मन्दिरको दर्शन पनि गरेका थिए।
