न्यूजमधेश डेस्क
जनकपुरधाम ,१९ असार । निवर्तमान संस्कृति पर्यटन तथा नागरिक उड्डयन मन्त्री उमाशंकर अरगरियाले सञ्चालनमा नआउँदै क्षतिग्रस्त कमला नदीको पुल निर्माणमा संलग्नलाई कारवाहीको माग गरेका छन् ।
मधेसको लाइफ लाइनको रुपमा रहेको हुलाकी राजमार्ग अन्तर्गत धनुषा र सिरहा जिल्ला जोडने कमला नदी पुल हस्तान्तरण तथा संचालनमा नआउँदै भासिएको घटनाप्रति दुस्ख व्यक्त गर्दै पूर्वमन्त्री अरगरियाले घटनाको सत्य तथ्य छानविनको माग गरेका छन् ।
निर्माणधीन पुल भाँसिनु वा भत्किँदा निर्माण सामग्री कमसल अर्थात गुणस्तरहीन रहेको स्पष्ट भएको भन्दै जसपाका नेता अरगरियाले तसर्थ पुल गुणस्तर छानविन समिति गठन गरी पुल निर्माणमा संलग्न कार्यालय, ईन्जिनियर तथा ठेकेदार सहित दोषीमाथि कडा कारवाहीको मांग गरेका छन् ।
साथै उक्त पुलको निर्माण काम अविलम्ब सुचारु गर्न गराउन समेत सम्बन्धित पक्षलाई आग्रह गरेका छन् । गुणस्तर पुल निर्माण गरी धनुषा र सिरहाका जनतालाई आवतजावतमा सहज पुर्याउन सरकारको ध्यानाकर्षण गराएका छन् ।
उक्त पुल निर्माणमा सो क्षेत्रबाट निर्वाचित सांसद समेत रहेका अरगरियाले विशेष पहल लिएका थिए । मन्त्री भइसकेपछि गृहजिल्ला पुग्दा निरीक्षण समेत गरेका थिए । १५ दिनभित्र सञ्चालन आउने भनेको पुल अविरल वर्षापछि नदीमा पानीको बहाव बढ्दा भाँसिएपछि पुलको गुणस्तरमै प्रश्न उठाउँदै पूर्वमन्त्री अरगरियाले छानविन समिति माग गरेका हुन् ।
